د لاسرسي لېنکونه

جمعه ۱ چنګاښ ۱۳۹۷ کابل ۰۳:۳۴

د ملګرو ملتونو عمومي منشي راتلونکې اوونۍ روسیې ته ځي


د ملګرو ملتونو عمومي منشي انتونیو ګوترش راتلونکې اوونۍ روسیې ته ځي.

ټاکل شوې ده چې نوموړی به د روسیې له ولسمشر ولادیمیر پوتین سره وګوري او دغلته به د فوټبال د نړیوال جام یوه سیالي هم ننداره کړي.

د ملګرو ملتونو ویاند دوجاریک د سې شنبې په ورځ وویل، د ملګرو ملتونو عمومي منشي به د جون په ۲۰مه او ۲۱مه په روسیه کې وي، دغلته به د روسیې له ولسمشر پوتین، بهرنیو چارو له وزیر لاوروف او د روسیې د ارتودکس کلیسا له مشر سره کتنې ولري.

د پورتګال دا پخوانی صدراعظم به روسیې ته د دې دوه ورځني سفر په ترڅ کې په مسکو کې په یوه څېړنیز مرکز کې وینا هم وکړي او په هغو مراسمو کې به ګډون وکړي چې په روسیه کې د ملګرو ملتونو د حضور د ۷۰مې کلیزې په مناسبت جوړېږي.

د ملګرو ملتونو د ویاند په وینا، د دې سازمان عمومي منشي به د مسکو په لوژنیکي سټوډیوم کې د پورتګال او مراکش ترمنځ د فوټبال د یوې لوبې ننداره هم وکړي.

روسیې ته پر لاره، د ملګرو ملتونو عمومي منشي فنلنډ او ناروې ته هم ورځي.

XS
SM
MD
LG