د لاسرسي لېنکونه

دوشنبه ۲۹ زمری ۱۳۹۷ کابل ۰۹:۰۲

له ۲۷ کلونو وروسته سکوپیه او اتن د مقدونیا لپاره په نوي نوم سلا شول


مقدونیا او یونان وايي، د پخوانۍ یوګوسلاویا د جمهوریت مقدونیا د نوم پر سر د ۲۷ کلنې شخړې د هواري لپاره خپلو کې یو جوړجاړي ته رسېدلي دي.

سکوپیه او اتن بالاخره د مقدونیا د نوم پر سر له ۲۷ کلونو ناندریو وروسته د پخوانۍ یوګوسلاویا د دې جمهوریت لپاره په نوي نوم سلا شول.

د مقدونیا صدراعظم زوران زایف د سې شنبې په ورځ «۱۳۹۷ کال د غبرګولي ۲۲» وویل چې دواړه لوري د مقدونیا لپاره د "شمالي مقدونیا جمهوریت" چې په مقدونیايي ژبه کې یې «Severna Makedonija» بولي سلا شول.

له‎دې سره به مقدونیا وکولای شي چې په اروپايي ټولنه او ناټو کې د ګډون لپاره مذاکرات مخکې یوسي.

الکسیس سیپراس او زوران زایف
الکسیس سیپراس او زوران زایف

د یونان صدراعظم الکسیس سیپراس سره په ټیلیفون له خبرو وروسته د مقدونیا صدراعظم زوران زایف خبریالانو ته وویل:

"له‎دې پریکړې د شا تګ لاره نه‎شته."

د مقدونیا صدراعظم زایف زیاته کړه، د دې هېواد د نوم په اړه په شوي جوړجاړي کې مقدونیايي کلتوري او نژادي هویت ساتل شوی دی.

د یونان صدراعظم سیپراس بیا په یوه ټلوېزیوني وینا کې وویل، د دواړو هېوادونو ترمنځ دا توافق د یونان د مقدونیا په نوم د ایالت او د مقدونیا د هېواد ترمنځ روښانه بېلتون څرګندوي.

د یونان صدراعظم همدارنګه وویل چې د مقدونیا نوم به هم په کورنۍ او هم په نړیواله کچه بدلېږي.

د شوي تړون له مخې د دې هېواد ژبه به مقدونیايي وي او وګړي به‌یې هم مقدونیايان بلل کېږي.

ټاکل شوې ده چې د دې توافق متن به د دې اوونۍ په پیل کې مخکې له‎دې چې د مقدونیا پارلمان ته تصویب لپاره واستول شي، د دواړو لورو ترمنځ لاسلیک شي.

په وړاندیز شوي نوم به همدارنګه د دې کال په پای کې په مقدونیا کې ټول‎پوښتنه هم ترسره کېږي.

د ناټو عمومي منشي ینس سټولټنبرګ دا یو تاریخي تړون بللی او په دواړو لورو یې غږ کړی چې نهايي یې کړي.

د ناټو عمومي منشي ینس سټولټنبرګ
د ناټو عمومي منشي ینس سټولټنبرګ

سټولټنبرګ په‎دې مناسبت په یو بیان کې ویلي دي، دا جوړ جاړی به سکوپیه د ناټو غړیتوب ته نږدې کړي او د لوېدیځ بالکان په سیمه کې به د سولې او ثبات له ټينګښت سره مرسته وکړي.

اروپايي ټولنې هم د یونان او مقدونیا صدراعظمانو ته په‎دې هوکړه مبارکي ویلې.

د اروپايي ټولنې د بهرنۍ پالېسۍ مشرې فدریکا موګرېني او د اروپايي ټولنې د پراختیا د مذکراتو کمېشنر جوهانیس هان په یو شریک بیان کې ویلي:

"دوی اوس د اروپايي شورا په تمه دي چې د پخوانۍ یوګوسلاویا د مقدونیا له جمهوریت سره د اروپايي ټولنې د شمولیت په اړه د خبرو اترو د پیل هغه پېشنهاد چې د اپرېل په ۱۷مه نېټه‌یې وراستولی تأیید کړي."

اتن او سکوپیه په‎دې وروستیو کې د ملګرو ملتونو په منځګړیتوب خپلو کې د نوم پر سر د کړکېچ د هواري لپاره هڅې چټکې کړې وې.

د دواړو هېوادونو ترمنځ د مقدونیا د نوم پر سر کړکېچ د ۱۹۹۱ میلادي کال راهیسې له هغه پیل شو چې مقدونیا په سوله‎ییزه توګه له پخوانۍ یوګوسلاویا بېله شوه او د مقدونیا جمهوریت په نوم‌یې خپلواکي اعلان کړه.

یونان هغه وخت د خپل ګاونډي هېواد په نوي نوم ناخوښه و او ویل‌یې د مقدونیا نوم د دې هېواد سره په پوله پراته، په همدې نوم د یونان پر یو ولایت ځمکنۍ دعوه له ځان سره لري.

د یونان د اعتراض له کبله مقدونیا په ملګرو ملتونو کې هم «د پخوانۍ یوګوسلاویا د مقدونیا جمهوریت» په نوم منل شوې وه او ناټو او اروپايي ټولنې هم په‎دې سازمانونو کې د مقدونیا د ګډون لپاره د یونان سره د نوم شخړه د یو خنډ په توګه یادوله.

XS
SM
MD
LG