د روسيې د حکومت د سیاسي مخالف الکسي ناوالني پلویان نن شنبه د مسکو په ګډون په مختلفو ښارونو کې د ولسمشر ولادمیر پوتین پر ضد لاریونونه او مظاهرې کوي.
که څه هم روسي چارواکو محدود شمېر لاریونونو ته اجازه ورکړې ده، خو د ناوالني ملاتړو په شااوخوا ۹۰ ښارونو کې مظاهرې او لاریونونه پلان کړي دي.
په همدې حال کې د روسيې په لېرې ختیځ او سابیریا کې د پولیسو له خوا د یو شمېر اعراض کوونکو د نیولو خبرونه رسېدلي دي.
د ننني لاریونونه چې (ته زمونږ پاچا نه يې) تر شعار لاندې کېږي، هدف په واک کې د اتلسو کلونو لپاره د ولادمیر پوتین د پاتې کېدو پر ضد غږ پورته کول دي.
د ولسمشر پوتین مخالفين نوموړی یو مستبد واکمن یادوي او د هغه حکومت فاسد بولي.
د روسيې د حکومت سیاسي مخالف الکسي ناوالني چې د مالي جرمونو په قضیه کې مجرم پېژندل شوی، د جمهوري ریاست لپاره له کاندیدۍ منع دی.
خو نوموړی وايي، پر ده لګېدلي تورونه جعلي دي او سیاسي انګېزه لري.
د نن ورځې تر لاریونونو دمخه د سات پیټرسبورګ، تامبو او کیمیروف ښارونو په ګډون، په ګڼ شمېر سیمو کې لسګونه حکومت ضد لاریون کوونکي توقیف شوي دي.
روسي چارواکي وايي، دا کسان ځکه نیول شوي چې د مظاهرو او لاریونونو د ترسره کولو لپاره يې له ټاکل شویو مقرراتو سرغړونه کړې ده.
چارواکو د الکسي ناوالني پلویانو ته خبرداری ورکړی چې په پایتخت مسکو کې لاریونونه ونه کړي .
روسي مقامات وايي، په مسکو کې د حکومت ددې سیاسي مخالف د پلویانو لاریونونه په بشپړ ډول غیر قانوني دي.