تمه ده د جرمني صدراعظمه انګلامرکل د جمعې په ورځ په سپینه ماڼۍ کې د امریکا له ولسمشر ډونالډ ټرمپ سره وګوري.
د جرمني صدراعظمه انګلا مرکل واشنګتن ته تللې، څو له امریکا سره اړیکې ښې کړي.
له ایران سره د اټمي تړون په اړه د امریکا او اروپايي قدرتونو د نظر توپير او د سوداګرۍ جنګ د جرمني او امریکا د اړیکو خنډ جوړوونکي بلل شوي دي.
د جرمني ډیپلوماټانو خپله صدراعظمه هڅولې چې واشنګټن ته دا دوه ورځنی سفر به یې سختې اړیکې اسانه کړي.
د امریکا مخکینیو ادارو جرمني د اروپايي ټولنې حقیقي مشر باله، خو اوس وضعیت داسې نهدی.
د امریکا ولسمشر ډونالډ ټرمپ د ایران د اټمي تړون ښکېلو قدرتونو ته د مې تر ۱۲مې وخت ورکړی چې له ایران سره اټمي تړون سم کړي.
ولسمشر ټرمپ چې دا تړون څو وار په خپلو خبرو کې شرموونکی بللی او ویلي یې دي چې که اصلاح نهشي ترې وبه وځي.
کله چې تېرمارچ انګلا مرکل له ټرمپ سره په سپينه ماڼۍ کې وکتل په دفاعي مصارفو، سوداګرۍ او کډوالۍ باندې یې د نظر زیات توپیرونه ښکاره کړل.
خو دا ځل مرکل ویلي چې له ټولو توپیرونو سره-سره هڅه کوي چې له امریکا سره خپله سټراټیژيکه ملګرتیا وپالي.
د ملګرتیا له پاللو هدف د ایران په اټمي تړون کې د پاتې کېدو لپاره د امریکا هڅول او هم له اروپا په وارداتو د ۲۵ فیصده تعرفو د لګولو ګواښ برطرفه کول دي.
ټرمپ تېره میاشت په اوسپنې او المونیم ۲۵ فیصده تعرفه وضعه کړه خو د متحدینو د اعتراض په سبب یې د مې تر لومړۍ لغوه کړه.
د تعرفو د لېرې کولو په اړه جزئیات نهشته، خو له ایران سره په اټمي تړون کې د امریکا د پاتې کولو هڅې یو څه کمرنګې بلل شوي.
د فرانسې ولسمشر امانوئل مکرون امریکا ته د خپل درې ورځني رسمي سفر په پای کې وړمه ورځ په واشنګټن کې وویل چې ولسمشر ډونالډ ټرمپ د کورنیو دلایلو او هم د هغې ژمنې لپاره چې د انتخاباتي کمپاین پرمهال یې د ایران د اټمي تړون د لغوه کېدو په اړه کړې وه، داسې نهښکاري چې دغه تړون ته دې درناوی وکړي.
که څه هم اروپا د ایران د اټمي تړون د اوسنۍ بڼې د اصلاح او تمدید هیله کوي، خو د ایران ولسمشر حسن روحاني د چهارشنبې په ورځ د اټمي تړون د بیا نوي کولو هیله رد کړه.
صفي الله ستانکزی