د افغانستان د ملي شورا یو شمېر غړي وايي، ناټو سازمان باید د جګړې پر ځای پر سولې ډېر تمرکز وکړي.
د افغانستان د ملي شورا یو شمېر غړي تمه ښيي چې د ناټو د بهرنیو چارو د وزیرانو په غونډه کې کېدونکې پرېکړه به د افغانستان په عمومي وضعیت مثبت اغېز وکړي.
د مشرانو جرګې د کورني امنیت او دفاعي چارو د کمېسیون رئیس هاشم الکوزي د پنجشنبې په ورځ «۱۳۹۷ کال د غويي ۰۶» ازادي راډیو ته وویل، د ناټو غړي هېوادونه باید پر سولې د ډېر تمرکز لهلارې په افغانستان کې د جګړې له پای ته رسېدو سره مرسته وکړي.
ښاغلی الکوزی وايي:
"جنګ د حللاره نهده موږ دا وایو چې دوی باید پوځیان افغانستان ته راونهلېږي، بلکې د جګړې د پای ته رسېدو او د سولې د ټینګښت په برخه کې له افغانانو سره همکاري وکړي."
د افغانستان د سولې او جګړې په اړه د ناټو د بهرنیو چارو د وزیرانو غونډه په داسې حال کې جوړېږي چې د افغانستان استازي پهکې نهشته.
یوې حکومتي سرچینې د پنجشنبې په ورځ ازادي راډیو ته وویل چې ناټو د بروکسل په ناسته کې د ګډون لپاره افغان حکومت ته بلنه نهده ورکړې.
خو په بروکسل کې د ازادي راډیو خبریال د ناټو د چارواکو له قوله وايي چې په سږنۍ ناسته کې یوازې د ناټو د غړو هېوادونو د بهرنیو چارو وزیرانو ته بلنه ورکړل شوې ده.
د ازادي راډیو د خبریال د معلوماتو لهمخې د ناټو په ناسته کې د افغانستان ګډون وار لهمخه په اجنډا کې نهو شامل، نو ځکه بلنه هم نهده ورکړل شوې.
ناټو د بروکسل غونډه کې افغانستان ته بلنه نهده ورکړې.
د بلجیم په پلازمېنه بروکسل کې به د ناټو د بهرنیو چارو د وزیرانو ناسته سبا پیل او د دوو ورځو لپاره به دوام وکړي.
تمه ده چې په دغې ناسته کې د افغانستان د سولې او جګړې په اړه مفصل بحثونه وشي.
د ناټو مرستیال ویاند پېرز کزالې ازادي راډيو ته ویلي چې ناټو دې ته ژمنه ده چې له افغان ځواکونو سره مرستې زیاتې کړي، څو د نړیوال ترورېزم په ځپلو کې تر ډېره په خپلو پښو ودرېږي.
د ولسي جرګې د دفاعي چارو د کمېسیون مرستیال علي اکبر قاسمي بیا وايي، ناټو په هغه ډول چې لازمه وه له افغان ځواکونو یې ملاتړ نهدی کړی.
نوموړی وايي:
"سمه ده چې دوی وايي، موږ د افغانستان له خلکو ملاتړ کوو، خو په کومه بڼه چې په تېر کې دوی له افغان ځواکونو ملاتړ کړی اغېزمن نهوو، نو ځکه د افغانستان خلک په ناټو بېباوره شوي دي."
د ښاغلي قاسمي په خبره که ناټو په رښتیا هم په افغانستان کې د جګړې د پای ته رسېدو او د افغان ځواکونو د پیاوړتیا اراده لري، باید په سوله او جنګ دواړو برخو کې مهم رول ولوبوي.
راپور: محمد حدیث پردېس
