د لاسرسي لېنکونه

شنبه ۱ غویی ۱۳۹۷ کابل ۰۷:۵۸

فرهاد: په شنډنډ کې د ۲ نورو ولسوالیو فعالېدو سره به امنیت ښه شي


د هرات چارواکي وايي، په شينډنډ کې د تشکيل شويو پاتې دوو ولسواليو په فعالېدو سره به په سيمه کې امنيتي وضعيت ښه شي.

افغان حکومت تېر کال پر پنځو ولسواليو د شينډنډ د ويشلو پرېکړه منظور کړه.

دغه پنځه ولسوالۍ دي، شينډنډ، زيرکوه، پشت کوه، کوه زور او زوال چې له دې جملې تر اوسه درې ولسوالۍ رسماً فعالې شوې دي.

د هرات د والي وياند جيلاني فرهاد وايي د دوو نورو ولسواليو په فعاليت سره به په سيمه کې امنيتي وضعيت ښه شي:

"د دوو نورو ولسواليو په فعالېدو سره په سيمه کې نور پوځيان او نور امکانات زياتېږي؛ دا کار کولاى شي په مجموع کې د شينډنډ وادي د ولسواليو د امن په ټينګښت کې مرسته وکړي."

په شينډنډ ولسوالۍ کې وړمه شپه پر يوه پوسته په حمله کې د نږدې ١٠ افغان پوځيانو د وژل کېدو خبر ورکړل شو.

تر دې مخکې په دې سيمه کې د افغان پوځيانو د پوځي عملياتو خبرونه هم ورکړل شوي دي.

XS
SM
MD
LG