د چین د سوداګرۍ وزارت وايي چې چین له امریکا سره تجارتي جګړه نهغواړي، خو وېره لري چې دا جګړه پرې تحمیل نهشي.
د چین د سوداګرۍ وزارت په یوه خبرپاڼه کې چې نن جمعه خپره شوه وویل چې که سپینه ماڼۍ د کورنیو تولیداتو د پرمختګ پالیسۍ یا پروتکشنېزم ته دوام ورکړي، نو چین به یې پر وړاندې ترپايه او په هر قیمت ودرېږي.
وروسته لهدې چې متحد ایالاتو په روانه اوونۍ کې له چینه پر ودارداتو ۵۰ میلیارد ډالره اضافي تعرفه ولګوله، چین په ځواب کې د سویابین او کوچنیو الوتکو په ګډون پر امریکايي محصولاتو ۵۰ میلیارد ډالره مالیه اعلان کړه، خو لهدې یوه ورځ وروسته د پنجشنبې په ورځ ولسمشر ډونالډ ټرمپ یو ناڅاپه د امریکا د سوداګرۍ استازو ته هدایت ورکړ چې د چین پر محصولاتو د اضافي تعرفې په اړه غور وکړي.
د ټرمپ طرحې ته له دوهمې نړیوالې جګړې په را وروسته موده کې تر ټولو د لویې تجارتي جګړې په سترګه کتل کېږي چې ورسره په نړیوال مارکېټ کې د ونډو بیې هم راولوېدې.
دا جګړه وروسته له هغې پیل شوه چې دواړه هېوادونه په تجارتي برخه کې د چین د تهاجمي تکتیکونو پر سر د یو بل په وړاندې ودرېدل.
د چهارشنبې او پنجشنبې په ورځو د ونډو بازارونه پهدې هیله ارام شول چې امریکا او چین ښايي دې ستونزې ته د ډيپلوماتیک حل لاره پیدا کړي، خو د جمعې په ورځ وروسته لهدې چې پېکېنګ د ټرمپ د ګواښ په وړاندې د مقابلې ژمنه وکړه، د ونډو بیې بیا راولوېدې.
سپینې ماڼۍ تېره شپه د ونډو د مارکېټونو له بندېدو وروسته د متحد ایالاتو د سوداګرۍ د استازو دفتر ته امر وکړ چې د چین پر تولیداتو د ۱۰۰ میلیاردو ډالرو اضافي تعرفې په اړه غور وکړي او معلومه کړي چې دا تعرفه پر کومو تولیداتو ولګول شي.
ښاغلي ټرمپ همدا راز د کرنې وزیر مؤظف کړ چې د امریکايي کروندګرو او کرنیزو تولیداتو د ګټو د خوندي کولو لپاره یو پلان جوړ کړي.
ټرمپ په یوه بیان کې وویل، د چین د نامشروع تجارتي اقداماتو له کبله- چې واشنګټن له کلونو راهیسې له پامه غورځولي دي، په امریکا کې زرګونه فابریکې ویجاړې شوي دي او میلیونونه وګړو خپلې دندې له لاسه ورکړي.
امریکايي چارواکي هڅه کوي چې د امریکا او چین د روانې تجارتي جګړې ګواښ بې اهمیته وښيي او وايي، دا ستونزه لا هم د خبرو له لارې حل کېدای شي، خو د اقتصادي چارو کارپوهان خبرداری ورکوي چې د دواړو خواوو په ځوابي اقداماتو کې د یوې تجارتي جګړې نښې نښانې ښکاري او ښايي دا جګړه پراخه شي.