د لاسرسي لېنکونه

دوشنبه ۲۶ لیندۍ ۱۳۹۷ کابل ۰۴:۲۸

د روسیې او چین د بهرنیو چارو وزیرانو د امریکا ځینې هڅې غندلي


د روسیې د بهرنیو چارو وزیر سرګي لاوروف پرون پنجشنبه په مسکو کې له خپل چینايي سیال سره د کتنې پر مهال وویل چې د ولسمشر ډونالډ ټرمپ اداره غواړي په هغو مسایلو کې چې ګڼ هېوادونه په‎کې ښکېل دي، په یوازې سر اقدام وکړي.

لاوروف له ایران سره د ۲۰۱۵ میلادي کال اټمي موافقه او د اقلیمي بدلون نړیواله موافقه چې د ۱۶۶ هېوادونو له خوا لاسلیک شوه، د مثال په توګه یاد کړل او ویې ویل چې متحد ایالات د نورو هېوادونو له رضایت سره-سره په هغو کې د بدلون راوستو هڅه کوي.

لاوروف وویل، دا له ډيپلوماسۍ سره هېڅ راز ارتباط نه‎لري، بلکې د امریکا د ګټو د ترلاسه کولو او د نورو هېوادونو د ګټو پر ضد د زور له لارې اقدام دی.

هغه زیاته کړه چې روسیې او چین په پرله‎پسې ډول د ټولو ښکېلو اړخونو ګټو ته د پاملرنې له لارې مثبتو سازشونو ته تیاري ښودلې ده.

د روسیې د بهرنیو چارو وزیر زیاته کړه چې روسیې تل د مهمو نړیوالو مسایلو د حل‎لپاره مستقیم ډيالوګ ته تیاري ښودلې او هېڅ‎کله له خبرو نه‎ده تښتېدلې، بلکې دا امریکا ده چې د ده په وینا له خبرو تښتي.

لاوروف وویل چې د ایران د اټمي موافقې په اړه خبرو څو کاله وخت ونیو او زیاته یې کړه، د روسیې دریځ دا دی چې په یو اړخېز ډول په دې موافقې کې هر راز بدلون به له ټولو اصولو او د امنیت شورا له پریکړه‎لیک څخه د سرغړونې په معنا وي.

ایران هم دې ته ورته دریځ خپل کړی او په‎دې موافقه کې له هر راز بدلون سره یې مخالفت څرګند کړی.

د چین د بهرنیو چارو وزیر ونګ لي پر متحدایالاتو د لاوروف له انتقاد سره خپل غږ غبرګ کړ، خو په خپلو څرګندونو کې یې تر ډېره امریکا ته د چین پر صادراتو د تعرفې د لوړېدو پر مسئله تمرکز وکړ.

ونګ لي وویل، نړیواله ټولنه باید په ګډه د امریکا له یو اړخېزو اقداماتو او د اصولو له ماتولو سره مخالفت وکړي.

ولسمشر ټرمپ د ایران د اټمي موافقې په مسئله کې له اروپايي هېوادونو غوښتي دي چې د دې موافقې هغه برخې چې د ده په وینا خطرناکې نیمګړتیاوې وې اصلاح کړي.

بریتانیا، فرانسې او جرمني د متحدایالاتو ترڅنګ پر دې موافقه لاسلیک کړی دی.

ټرمپ په ځانګړي ډول پر دې انتقاد کوي چې ولې په موافقه کې د ایران د بالستیک توغندیو د پروګرام د محدودولو غوښتنه نه‎ده شوې او د یورانیمو د غني کولو پر پروګرام او ځینو نورو اټمي فعالیتونو د محدودیت مهلت له لسو کلونو وروسته ختمېږي.

د دې محدودیتونو په بدل کې پر ایران د لویدیځو هېوادونو له‎خوا د لګول شویو بندیزونو د نرمېدو ژمنه شوې ده. ولسمشر ټرمپ ګواښ کړی دی چې که له ایران سره په تړون کې دا نیمګړتیاوې اصلاح نه‎شي، نو متحد ایالات به یې له خپلې خوا فسخ کړي.

دا په داسې حال کې ده چې د امریکا اروپايي متحدان هڅه کوي چې د ټرمپ د ادارې اندېښنې له‎منځه یوسي.

XS
SM
MD
LG