د بریتانیا د بهرنیو چارو وزیر بورېس جانسن روسیه د اعصابو د بېسده کوونکو ګازو په زېرمه کولو تورنوي.
ویل کېږي له دې ګازو په دې وروستیو کې د هغه پخواني روسي جاسوس په بېسده کولو کې کار اخیستل شوی چې په بریتانیا کې اوسېده.
بورېس جانسن د یکشنبې په ورځ دا تور په داسې حال کې ولګاوه چې تمه ده، نن دوشنبه د کیمیاوي وسلو د کارپوهانو یو نړیوال پلاوی بریتانیا ته ورسېږي او د سرګي سکريپال او د هغه د لور یولیا د بېسده کېدو مسئله وڅېړي.
سرګي چې د روسيې پخوانی جاسوس دی، له خپلې لور سره د بریتانیا په سوېلي ښار سالزبري کې دوه اوونۍ مخکې بېسده وموندل شول.
بریتانیا ویلي، دوی دواړه د روسیې لهخوا د اعصابو په بېسده کوونکو زهري موادو مسموم شوي.
بریتانوي چارواکي وايي، د اعصابو دا بېسده کوونکي زهري مواد د نویچوک زهري ګازو له ډلې دي چې د پخواني شوروي اتحاد په وخت کې جوړېدل.
د بریتانیا د بهرنیو چارو وزیر بورېس جانسن د یکشنبې په ورځ له «بي. بي. سي» سره په مرکه کې روسیه تورنه کړه چې په وروستیو کلونو کې یې له نویچوک ګازو استفادې ته پراختیا ورکړې ده.
نوموړی وايي:
"په حقیقت کې موږ داسې شواهد لرو چې روسیې په وروستیو ۱۰ کلونو کې نهیوازې د ترور په هدف د اعصابو د بېسده کولو لپاره دا مواد څېړلي، بلکې نویچوکیې جوړ کړی او زېرمه کړي یې دي."
خو روسیه دا ټول تورونه ردوي.
په اروپايي ټولنه کې د روسیې سفیر د شنبې په ورځ «بي. بي. سي» ته ویلي چې دغه هېواد له ۱۹۹۲میلادي کال راوروسته د هر ډول بېسده کوونکو کیمیاوي موادو تولید بند کړی او کېدای شي د سرګي سکریپال او د هغه په لور د استعمال شویو موادو سرچینه د بریتانیا کوم څېړنیز مرکز وي.
د مارچ په څلورمه د پخواني روسي جاسوس سرګي سکریپال او د هغه د لور یولیا د مسمومېدو پېښه د دې لامل شوه چې بریتانیا ۲۳ روسي ډیپلوماتان له دغه هېواده وباسي او مسکو هم ویلي چې د ځینو بریتانیايي ډیپلوماتانو په ایستلو باالمثل اقدام کوي.
د بریتانیا د بهرنیو چارو وزیر د یکشنبې په ورځ خبریالانو ته ویلي:
"د مسمومولو د مسؤلیت ریښه راساً کرملېن ته رسېږي."
د بریتانیا د بهرنیو چارو وزارت د یکشنبې په ورځ په اعلامیه کې ویلي چې د کیمیاوي وسلو د مخنیوي سازمان څېړونکي نن دغه هېواد ته رسېږي او د ښاغلي سکریپال او د هغه په لور د کارول شویو مسمومونکو موادو په اړه خپلې څېړنې پیلوي.
د روسیې د پوځ د استخباراتو پخواني جاسوس سرګي سکریپال د څو نورو روسي جاسوسانو نومونه هم بریتانوي چارواکو ته ورکړي دي.
راپور: صفيالله ستانکزی
