افغانستان د کرکټ د نړیوال جام د غوراوي د سیالیو د شپږو غوره ټیمونو په لوبو کې لومړۍ لوبه له ویسټ انډیزه وګټله.
د پرونۍ لوبې پچه ویسټ انډیز وګټله او د بېټنګ پریکړه یې وکړه.
ویسټ انډیز په پنځوسو اوورونو کې ۱۹۷ منډې وکړې.
افغان بالرانو مجیبالرحمن په ۱۰ اوورو کې یوازې ۳۳ منډې ورکړې او درې لوبغاړي یې وسوځول.
په بېټنګ کې افغان لوبغاړو د ویسټ انډیز د ځواکمنې لوبډلې لهخوا ورکړل شوي هدف ته چې ۱۹۸ و، په ۴۸م اوور کې د اوو لوبغاړو په سوځېدو ځان ورساوه.
رحمتشاه په ۱۰۹ بالونو ۶۸ منډې او محمدنبي په ۵۴ بالونو ۳۱ منډې وکړې.
افغان لوبډلې د نړیوال جام د غوراوي د مخکینیو څلورو لوبو یوازې یوه وګټله او په جدول کې درېیم راغی، خو وروسته له دې چې نیپال هانګکانګ ته ماتې ورکړه، افغانستان ته د ډېرو منډو د اوسط په خاطر د درېیو نورو لوبو چانس هم ورکړل شو.
د افغانستان دوه نورې لوبې- یوه د مارچ په ۲۰مه «د راتلونکې اوونۍ سې شنبې ورځ» له متحده عربي اماراتو او بله د مارچ په ۲۳ مه له ایرلنډ سره د زیمبابوې په پلازمېنه هرارې کې کېږي او افغانستان نړیوال جام لوبو ته د غوره کېدو لپاره باید دا دواړه لوبې وګټي.