د لاسرسي لېنکونه

چهارشنبه ۲۱ لیندۍ ۱۳۹۷ کابل ۰۵:۲۲

د فاریاب ولایتي شورا: د دې ولایت ۹۰ سلنه خاوره وسله‌والو طالبانو سره ده


تر فراه ولایت وروسته له فاریاب نه د نا امنیو خبرونه خپریږي، د دغه ولایت د ولایتي شورا مرستیال وايي، که وضعیت ته جدي پام ونه‎شي، نوموړی ولایت به سقوط شي.

صبغت‎الله سیلاب د یکشنبې په ورځ ازادي راډیو ته وویل چې دا مهال د فاریاب ولایت ۹۰ سلنه خاوره له وسله‎والو طالبانو سره او یوازې ۱۰ سلنه یې له حکومت سره ده.

نوموړی وايي:

"وسله‎وال طالبان اوس‎مهال د المار ولسوالۍ تر یو کیلو مټرۍ پورې فعاله دي، په قیصار کې هم دغه شان، د پښتون‎کوټ ولسوالۍ ۹۰سلنه برخه د طالبانو په واک کې ده، موږ وضعیت ته اندېښمن یو، که عملیات ونه‎شي او له لاسه وتلې سیمې بېرته ونه نیول شي، فکر کوم ولسوالۍ به سقوط وکړي او جنګ به د فاریاب تر مرکز میمنې پورې را ورسېږي."

د ښاغلي سیلاب په خبره، په دغه ولایت کې د امنیتي ځواکونو کمښت، د امکاناتو او تجهیزاتو نه‎شتون، د امنیتي ځواکونو تر منځ نه هم‎غږي په دغه ولایت کې د وسله‎والو مخالفینو د پراخ حضور عمده لاملونه دي.

خو د فاریاب والي ویاند احمد جاوید بیدار ازادي راډیو سره په خبرو کې د نوموړي څرګندونې په هغه پورې اړوندې وبللې او د نوموړي ولایت د امنیت په اړه یې ډاډ ورکړ.

په فاریاب ولایت کې د دښمن خوځښتونه شته، خو جدي نه‎دي.

د فاریاب د سقوط په اړه د دغه ولایت د ولایتي شورا د غړو اندېښنې وروسته له هغې مطرح کېږي چې په افغانستان کې د یو شمېر ولایتونو ولسوالۍ په څو ځلي د وسله‎والو طالبانو له‎خوا سقوط شوي او ان کندز ولایت هم دوه ځله سقوط شوی، خو بېرته د افغان ځواکونو له‎خوا نیول شوی.

له فاریاب مخکې د فراه ولایت د امنیت په اړه هم اندېښنې موجودې وې.

په ورته وخت کې د افغانستان دفاع وزارت په فاریاب کې د وسله‎والو مخالفینو خوځښتونه تأییدوي وايي چې دا ډېر جدي نه‎دي.

د دفاع وزارت ویاند دولت وزیري
د دفاع وزارت ویاند دولت وزیري

د دغه وزارت ویاند دولت وزیري په دې اړه ازادي راډیو ته وویل:

"په فاریاب ولایت کې د دښمن خوځښتونه شته، خو جدي نه‎دي، تېره شپه زموږ کومانډو ځواکونه هغه ولایت ته رسیدلي، دفاع وزارت په جریان کې ده، هلته به عملیات هم پیل شي او نور ځواکونه به هم واستول شي."

د افغانستان په شمالي ولایت فاریاب کې د امنیت په اړه اندېښنې په داسې حال کې مطرح کېږي چې افغان حکومت تازه د کابل پروسې په دوهم پړاو ناسته کې وسله‎والو طالبانو ته د سولې د خبرو لباره نوې طرحه وړاندې کړه، خو وسله‎والو طالبانو تر اوسه په رسمي ډول ورته خواب نه‎دی ویلی.

خو افغان حکومت دا هم وايي چې د سولې د خبرو تر څنګ به له هغو مخالفینو سره چې جګړه کوي، د جګړې له میدانونو هم پام وانه‎ړوي.

راپور: اجمل تورمان

XS
SM
MD
LG