هرالډ ورځپاڼې په افغانستان کې د داعش د فعالیتونو په اړه یوه لیکنه کړې چې سرلیک یې دی: افغانستان د اسلامي دولت د ډلې لپاره نوې جبهه.
د دې لیکنې لیکوال په افغانستان کې هغو وروستیو بریدونو ته چې د داعش وسلهوالې ډلې یې مسؤلیت اخېستی اشاره کړې او زیاته کړې یې ده، د ۲۰۱۷ میلادي کال په اپریل میاشت کې وروسته له هغې چې امریکا په اچین ولسوالۍ کې د "بمونو د مور" په نوم دروند بم وغورځاوه، چارواکو وویل چې په دې برید کې د داعش تر ۹۰ زیات وسلهوال وژل شوي او په ننګرهار کې د دوی یو لوی پټنځای ویجاړ شوی دی.
افغانستان د اسلامي دولت د ډلې لپاره نوې جبهه
ورځپاڼه وايي، په افغانستان کې د امریکايي ځواکونو قوماندان جنرال جان نیکلسن او نورو پوځي چارواکو د دې درانه بم کارول توجیه کړل او دا یې د دې کال تر پای پورې په افغانستان کې د اسلامي دولت سره د تړلې وسلهوالې ډلې د لهمنځه وړلو د کمپاین یوه برخه وبلله.
پوځي قوماندانانو هغه مهال وویل چې په افغانستان کې د داعش وسلهوالو شمېر له ۳۰۰۰ څخه ۷۰۰ ته راکم شوی او د دوی د فعالیت ولسوالۍ له ۱۱ څخه درې ولسوالیو ته محدودې شوي دي.
خو د لیکوال په وینا اوس چې ۲۰۱۷ میلادي کال پای ته رسېدلی، داسې ښکاري چې په افغانستان کې د داعش حضور کمزوری شوی نه، بلکې پیاوړی شوی دی.
ورځپاڼه په ویلسن څېړنیز مرکز کې د سیمې د چارو د یو څېړونکي مایکل کوګلمن له خولې وايي، د پر لهپسې هوايي بریدونو وروسته په افغانستان کې د داعش د وسلهوالې ډلې مقاومت د اندېښنې وړ دی.
کوګلمن د هرالډ ورځپاڼې ته په افغانستان کې د داعش د وسلهوالې ډلې د مقاومت یو سبب د افغانستان اراضي بللې چې وسلهوال په کې کولی شي په اسانۍ له هوايي بریدونو ځان وژغوري او بل سبب یې د داعش له وسلهوالې ډلې سره په زیات شمېر د پاکستاني طالبانو او نورو سخت دریځو یوځای کول کیدل بللي دي.
هرالډ ورځپاڼې په افغانستان کې د داعش د وسلهوالې ډلې د حضور په اړه د روسیې اندېښنه هم راخېستې او وايي:
روسیه اټکل کوي چې دا مهال په افغانستان کې د ۱۰ زرو په شاوخوا کې داعش وسلهوال شته چې ورسره د سوریې او عراق څخه تښتیدلي داعش وسلهوال هم یوځای شوي دي.
د ورځپاڼې په وینا مسکو په ځانګړي توګه د افغانستان په شمال ولایتونو کې د داعش د وسلهوالې ډلې د حضور په اړه اندېښنه لري، چېرې چې ځايي خلکو الجزایري، فرانسوي او نور بهرني وسلهوال کتلي دي.
- جاپان ټایمز
جاپان ټایمز ورځپاڼې یو مطلب په دې لیکلی چې د جنورۍ لومړۍ نېټه د ګڼو افغانانو د زوکړې نېټه ده.
ورځپاڼه وايي، ګڼ افغانان د زوکړې اسناد نهلري او ډېرو ته یې د خپل تولد دقیقه نېټه هم نهده معلومه.
اوس چې په ټولنیزو رسنیو لکه فیسبوک کې د ځان ثبتولو او همدارنګه نورو قانوني اسنادو د اخېستلو لپاره د زوکړې دقیقه نېټه ځیني غواړي، نو دوی په خپله خوښه د کال له ورځو ځان ته یوه انتخابوي او ډېرو هغو افغانانو چې د زوکړې ورځ یې نهده ورمعلومه د جنورۍ لومړۍ نېټه انتخاب کړې ده.
جاپان ټایمز زیاتوي په وروستیو کلونو کې د افغانستان په لویو ښارونو کې یو شمېر روغتونو نویو زیږیدلو ماشومانو ته د زوکړې تصدیقونه ورکول پیل کړي، هغه څه د دې هېواد پخوانیو نسلونو نه درلودل.