د افغانستان د عامې روغتیا وزارت وايي چې د هېواد په کچه کابو ۸۰ سلنه افغانان لومړنیو روغتیايي خدماتو ته لاس رسی لري.
د عامې روغتیا وزیر ډاکټر فیروز الدین فیروز بلخ ولایت ته د خپل سفر په ترڅ کې خبریالانو ته وویل چې د افغانستان نېږدې ۸۰ سلنه وګړي روغتیايي خدماتو څخه برخمن دي او دا رقم دوه کاله پخوا ۶۰ سلنو ته رسېده.
هغه وویل چې د تېرو دوه کلونو په ترڅ کې د ټولو هېواد په کچه ۴۰۰ روغتیايي مرکزونو په لېرو پرتو سیمو کې جوړ شوي دي چې همدا مهال اړینو کسانو ته صحي خدمات وړاندې کوي.
ښاغلي فیروز وویل:
"الحمد الله په تېرو دوو کلونو کې ۴۰۰ روغتیايي مرکزونه په ټول هېواد کې جوړ شوي چې په لېرو پرتو سیمو کې له ۷۵ نه تر ۸۰ سلنه افغانان پهکې خپله درملنه کوي."
د عامې روغتیا وزیر وايي چې صحي خدماتو ته د خلکو د لاسي د زیاتوالي ترڅنګ لا هم سرطاني ناروغۍ د دې لامل شوي چې ډېری افغانان د خپلو ناروغیو د درملنې لپاره له هېواده بهر ولاړ شي.
ډاکټر فیروز الدین فیروز زیاته کړه:
"یو شمېر ناروغۍ لکه سرطان او نورې ناروغۍ ددې لامل شوي چې ډېری هېوادوال مو د خپلو ناروغیو د درملنې لپاره بهر لاړ شي، خو په دې برخه کې په کابل او هم په حوزوي ولایتونو کې کار شوی او صحي مرکزونه به ورته جوړ شي."
د عامې روغتیا وزیر وايي چې افغانان هر کال ۳۰۰ میلیون ډالر له هېواده بهر د خپلو ناروغیو په درملنې لګوي.
د عامې روغتیا وزیر په بلخ ولایت کې د څلورو صحي مرکزونو د بنسټ ډبرې هم کېښودلې او ویې ویل چې د یادو مرکزونو په جوړېدو سره به لسګونه زره کسانو ته صحي خدمات وړاندې شي.
پهدې څلورو مرکزونو کې یو هم د دارو د کیفیت د تعینولو مرکز و چې د ښار جوړونې وزارت لهخوا یې مصرف ورکول کېږي او ټولیز لګښت یې ۹۴ میلیون افغانۍ برآورد شوی دی.
درې نور مرکزونه چې یو یې د واکسین د ساتنې مرکز، بل یې پولي کلینیک او بل یې هم د توبرکولوز ناروغۍ ۲۴ بستریز روغتون دی چې د افغانستان د عامې روغتیا وزارت او هندوستان او ترکیې هېوادونو په مالي لګښت جوړېږي.
د عامې روغتیا وزارت د معلوماتو پر بنسټ په دې څلورو روغتیايي مرکزونو کابو ۲ میلیونه امریکايي ډالر لګښت راغلی دی.
راپور: مجیب الرحمن حبیب زی
