- ډېلي مېل
بریتانوۍ ډېلي مېل ورځپاڼه په افغانستان کې له اسلامي دولت ډلې یا داعش سره د دې ډلې د منځني ختیځ د سخت دریځو د یوځای کېدو په اړه په یوه مطلب کې لیکي؛
له سوریې څخه فرانسوي او الجزایري سخت دریځي د افغانستان په شمال کې د اسلامي دولت ډلې له وسلهوالو سره چې په دې وروستیو کې یې په سیمه کې د ځان لپاره یوه اډه جوړه کړې، یوځای شوي دي.
ډېلي مېل لیکي:
دا خبره یو شمېر افغان او نړیوالو سرچینو د فرانسې خبري اژانس ته کړې ده.
د ورځپاڼې په وینا دا لومړی ځل دی چې په افغانستان کې د داعش په لیکو کې د سخت دریځو فرانسویانو حضور تأییدېږي او هغه هم په داسې وخت کې چې د یو شمېر تحلیلګرانو په باور په سوریه او عراق کې د داعش له ماتې وروسته ښایي بهرنیان دغه جګړه ځپلي هېواد ته مخه کړي.
د ورځپاڼې په لیکنه دا د فرانسې لپاره هم چې له ۲۰۱۵ میلادي کال راهیسې له داعشه د الهام اخیستونکو تر ټولو خونړیو حملو شاهده وه، د اندېښنې وړ مسئله ده.
د هغه هېواد لپاره چې نهپوهېږي له خپلو هغو په سلګونه اتباعو سره چې منځني ختیځ ته د دغې ډلې په پلوي جګړو کې د ګډون لپاره تللي، څه وکړي؟
د راپورونو له مخې د اسلامي دولت نومې ډلې یا داعش وسلهوالو په دې وروستیو کې د افغانستان په شمال جوزجان په تېره بیا د دې ولایت په درزاب ولسوالۍ کې فعالیتونه زیات کړي دي.
د درزاب ولسوال باز محمد داور ویلي چې د الجزایر او فرانسې یو شمېر اتباع په سیمه کې د داعش تر کنټرول لاندې سیمو ته داخل شوي دي.
په کابل کې اروپایي او افغان امنیتي سرچینو هم د هغه دا خبره تائید کړې، خو دا یې نهدي ویلي چې شمېر یې څومره دی؟
د درزاب اوسېدونکو بیا ویلي چې شااوخوا ۲۰۰ بهرنیو وسلهوالو د بي بي مریم له کلي څو سوه متره لیرې د ځان لپاره یو کمپ پرانیستی دی.
یو شمېر اروپایي سرچینو ویلي چې اکثره دغه بهرني وسلهوال له تاجکستانه د افغانستان خاورې ته داخل شوي دي.
د ډېلي مېل په لیکنه، افغانستان خپل ځان ته د بهرنیو وسلهوالو د راکاږلو یوه اوږده سابقه لري، په ۱۹۸۰ لسیزه کې د پخواني شوروي د یرغل په وړاندې د افغانستان جهاد ته ډېرو بهرنیانو په تېره بیا عربانو رادانګلي و چې وروسته القاعدې له دې هېواده د ځان لپاره د یوه امن ځای په توګه کار واخیست.
د ډېلي مېل په وینا که څه هم پنټاګون وایي چې په افغانستان کې د داعش د وسلهوالو شمېر له زرو کم دی، خو د چارو د یو شمېر کارپوهانو په باور په دې هېواد کې د بهرنیو وسلهوالو مخ په زیاتېدونکي حضور ته په پام سره داسې نښې لیدل کېږي چې داعش د نړیوالو حملو لپاره د بهرنیو وسلهوالو یوه عملیاتي برخه په دې هېواد کې فعالوي.
- امریکایۍ بېلوېل نیوز ډموکرات انټرنټي خپرونه
امریکایۍ بېلوېل نیوز ډموکرات انټرنټي خپرونې امریکا ته د محمد یونس یوسفزي په نوم د هغه ځوان افغان ترجمان سفر ته پام اړولی چې له څو کلونو هلو ځلو وروسته د امریکا په هیوسټون کې له خپل پخواني امریکایي امر سره یوځای شوی دی.
۲۴ کلن یوسفزي چې هغه وخت ۱۷ کلن و، په هلمند کې د امریکايي پلي سمندري ځواکونو د یوه جزتام له قوماندان ډګرمن مایک هډسون سره د ژباړونکي په توګه کار کاوه.
د خپرونې په لیکنه، هډسون چې اوس په امریکا کې د احتیاطي پوځیانو په اډه کې دنده سرته رسوي وایي، ده چې کله خپل پخوانی ترجمان ولید چې بالاخره امریکا ته راورسېد، ډېر د خوښۍ احساسیې وکړ.
دی وایي دغه سفر څلور کاله وخت ونیو دا اندېښنه ورسره وه چې ښایي هغه دومره ژوندی پاتې نهشي چې دغه سفر ترسره کړي.
یوسفزي دې خپرونې ته ویلي، د هډسون په لیدو یې داسې احساس وکړ چې یوازې نهدی او اوس یوه کورنۍ لري.
د خپرونې په وینا د امریکا د حکومت د سپټمبر میاشتې د راپور له مخې د افغانانو لپاره د مهاجرت ویزو د ځانګړي پروګرام په ترڅ کې تر اوسه له ۹ زرو زیات کسان چې د امریکا د ویزې غوښتنهیې کړې، ویزو اخیستو ته منتظر دي.