د ۱۹ زره افغان سرحدي ځواکونو قومانده او مسؤلیت د شنبې په ورځ رسماً له کورنیو چارو وزارته دفاع وزارت ته انتقال شو.
افغان ولسمشر محمد اشرف غني وايي، سرحدي ځواکونه به تر دې وروسته میلیاردونه ډالر د دولت ملي خزانې ته راوړي.
ښاغلي غني چې د شنبې په ورځ د ۱۳۹۶ کال د لیندۍ په ۱۱ مه یې له کورنیو چارو وزارته دفاع وزارت ته د سرحدي ځواکونو د انتقال په مراسمو کې خبرې کولې، ویې ویل چې که د افغان ځواکونو مېړانه نه وای، حکومت به سیاسي لاسته راوړنې هم نه لرلای.
ښاغلي غني زیاته کړه:
"اړتیا ده چې په سرحدي ځواکونو هم د کومانډو او اردو په څېر پانګونه وشي او د سرحدي قواوو تنظیم حد اقل کولای شي چې په راتلونکو کلونو کې میلیاردونه ډالر د دولت خزانې ته راوړي."
ښاغلي غني وویل، له دفاع وزارت سره د سرحدي ځواکونو په یوځای کېدو به له وسله والو مخالفینو د نیول شویو سیمو د ساتنې ستونزه هم هواره شي.
دی وايي، پخوا افغان ځواکونه په دې برخه کې له ننګونو سره مخ وو.
د افغانستان دفاع وزارت د سرحدي ځواکونو د انتقال پروسه شااوخوا ۱۱ میاشتې وړاندې پیل شوې وه.
د معلوماتو له مخې، د سرحدي ځواکونو ټول شمېر چې دفاع وزارت ته انتقال شوی، شااوخوا ۱۹زره تنو ته رسېږي.
د افغانستان د دفاع وزارت سرپرست طارق بهرامي بیا د سرحدي ځواکونو ستونزو ته په اشارې سره د دوی د سمبالښت یادونه کوي او وايي چې دغه ځواکونه به په پرمختللو وسلو سمبال شي.
ښاغلي بهرامي وویل:
"له کورنیو چاوزارت څخه دفاع وزارت ته د سرحدي ځواکونو انتقال د دوو هدفونو لپاره وشو، یو دا چې له دغه ځواکونو د ملي اردو ملاتړ وشي او بله مسئله دا چې په دغو ځواکونو کې لازم اصلاحات رامنځته شي، د سرحدي ځواکونو معاشونه به هم له درېیو زرو تر پنځو زرو افغانیو زیات شي."
د کورنیو چارو سرپرست وزیر ویس احمد برمک بیا وايي چې لاهم څلور زره سرحدي ځواکونه د کورنیو چارو وزارت په چوکاټ کې پاتې دي.
د ښاغلي برمک په خبره، دغه ځواکونه به په بندرونو کې د قانون د تنفیذ په برخه کې خپلې چارې مخته یوسي.
راپور: محمد حدیث پردېس