په شمال زون کې د ۲۰۹ شاهین قول اردو چارواکي وايي چې د هوايي او کومانډو ځواکونو د عملیاتو په نتیجه کې یې په تېره یوه میاشت کې په ۵ شمالي ولایتونو کې کابو ۵۰۰ ترورېستانو ته مرګ ژوبله اړولې ده.
د ۲۰۹ شاهین قول اردو ویاند نصرتالله جمشیدي ازادي راډیو ته وویل چې دا عملیات د خالد ۹۶ عمومي عملیاتو په چوکاټ کې د کومانډو او هوايي ځواکونو لهخوا په بلخ، سمنګان، سرپل، جوزجان او فاریاب ولایتونو کې ترسره شول.
ښاغلي جمشیدي په تېره یوه میاشت کې د افغان دولت مخالفو وسلهوالو ته د اوښتو تلفاتو په اړه وویل:
"۲۸۷ تنه طالب وسلهوال په پنځو شمالي ولایتونو کې وژل شوي دي، ۱۷۸ نور یې ټپیان دي او ۳۷ تنهیې افغان امنیتي ځواکونو ته تسلیم شوي دي."
د شاهین قول اردو چارواکي وايي چې په دې عملیاتو کې افغان ځواکونو ته هم تلفات اوښتي دي، خو کره شمېره د شاهین قول اردو د ویاند لهخوا په ډاګه نهشوه.
افغان امنیتي چارواکي وايي چې په شمال زون کې د افغان دولت مخالفو وسلهوالو په منځ کې بهرني ترورېستان هم شامل دي چې په شمال او شمال ختیځ ولایتونو کې د افغان دولت په وړاندې وسلهواله جګړه پر مخ بیايي.
د شاهین قول اردو ویاند نصرتالله جمشیدي وايي چې د وژل شویو وسلهوالو په منځ کې ازبکستاني، تاجکستاني او پاکستاني طالب جنګیالي هم شامل دي.
هغه په دې اړه وویل:
"طالبانو ته په اوښتو تلفاتو کې د هغه کسانو مړي هم شامل دي چې بهرني جنګیالي دي، دوی د ازبکستان، تاجکستان او پاکستان تابعیت لري او د افغان امنیتي ځواکونو په وړاندې یې جګړه کوله."
د وژل شویو وسلهوالو په منځ کې ازبکستاني، تاجکستاني او پاکستاني طالب جنګیالي هم شامل دي.
د شاهین قول اردو چارواکي وايي چې د ملکي کسانو د تلفاتو د مخنیوي په هدف اوسمهال ډېری هوايي ځواکونه او کومانډو سرتېري د شپې لهخوا ترورېستان په نښه کوي.
د شاهین قول اردو ویاند وايي چې اوسمهال د یادې نظامي اډې کشفي برخه او ځمکني ځواکونه په بلخ، جوزجان او فاریاب ولایتونو کې خپل محاربوي عملیات پر مخ بیایي.
د افغان دولت هېڅ یوې مخالفې وسلهوالې ډلې د شاهین قول اردو د یادو ادعاوو په اړه غبرګون نهدی ښودلی.
راپور: مجیبالرحمن حبیبزی
