په پاکستان کې د افغانستان سفارت وايي، د کونړ مرستیال والي له دې پرته چې دوی په جریان کې پریږدي پاکستان ته ورغلی دی.
په اسلاماباد کې د افغان سفیر مرستیال زردشت شمس د یکشنبې په ورځ له ازادي راډیو سره په خبرو کې که څه هم په دې اړه دېر جزئیات ورنهکړل چې محمد نبي احمد د پاکستان په کومه سیمه کې د چا لهخوا یرغمل شوی خو وايي، د خلاصون لپاره یې هڅې روانې دي.
د ښاغلي شمس په خبره د پاکستان حکومت د کونړ د مرستیال والي د خلاصون لپاره د هر ډول همکارۍ ډاډ ورکړی.
دی وايي:
"افغان سفیر د پاکستان د بهرنیو چارو وزارت او دغه شان د دوی له امنیتي ادارو سره په تماس کې دی او د نوموړي د خلاصون غوښتنه مو کړې، هغوی هم په دې برخه کې د پوره همکارۍ ډاډ راکړی دی."
د کونړ مرستیال والي قاضي محمدنبي احمد څلور ورځې وړاندې د درملنې په هدف پاکستان ته تللی و، خو د نامعلومو کسانو له لوري یرغمل شو.
که څه هم افغان سفارت په دې اړه چې ښاغلی احمد د پاکستان په کومه سیمه کې یرغمل شوی څه نه وايي، خو په پېښور کې افغان قونسل معین مرستیال ایکسپریس ټریبیون ورځپاڼې ته ویلي چې د کونړ مرستیال والي د پېښور د ډبګرۍ په سیمه کې د وسلهوالو له لوري برمته شوی دی.
له دې وړاندې هم یو شمېر افغان چارواکي په پاکستان کې د نامعلومو وسلهوالو له لوري برمته شوي دي.
په پېښور کې د افغانستان پخوانی قونسل عبدالخالق فراهي او د کونړ پخوانی والي فضلالله وحیدي په پاکستان کې د برمته شوېو افغان چارواکو له ډلې څخه دي چې وروسته بیا خوشې شوي دي.
د کونړ د مرستیال والي زوی احسان الله ازادي راډیو ته وویل، پلار یې په قانوني ویزه د درملنۍ په هدف پاکستان ته تللی دی.
نوموړی وايي، که څه هم د پلار له لا درکه کېدو یې څو ورځې تیرېږي خو تر اوسه په دې اړه هېڅ ډول معلومات نهلري.
دی وايي:
"موږ د افغانستان د بهرنیو چارو وزارت او دغه شان په پاکستان کې له اړونده ادارو سره اړیکه نیولی خو تر دې دمه موږ ته هېچا په دې اړه چې دغه قضیه څنګه او چېرته رامنځته شوې او څوک پهکې ښکیل دي، معلومات نهدي راکړي."
نوموړی وايي، که څه هم لا تر اوسه معلومه نهده چې پلار یې چا برمته کړی خو سپارښتنه یې دا ده چې افغان حکومت باید د پاکستان له حکومت او په ځانګړي ډول د نوموړي هېواد له امنیتي او استخباراتي ادارو سره د ښاغلي احمد د موندولو لپاره جدي هڅې وکړي.
راپور: محمد حدیث پردېس
