د افغان ولسمشر محمد اشرف غني نن یکشنبه سهار د ترکمنستان پلازمېنې عشق اباد ته لاړ چې د اسیايي لوبو په پرانېستونکو مراسمو کې ګډون وکړي.
جمهوري رياست په يوه اعلاميه کې ويلي، ولسمشر غني به په دې سفر کې د ترکمنستان او تاجکستان له ولسمشرانو سره هم جلا جلا وویني.
دغه راز ټاکل شوې ده چې ښاغلی غني له ترکمنستان څخه د ملګروملتونو د عمومي اسمبلۍ په ۷۲ یمه غونډه کې د ګډون لپاره نیویارک ته لاړ شي.
د ولسمشر مرستيال وياند نجيب ازاد نن ازادي راډيو په خپلو خبرو کې وویل چې ولسمشر محمد اشرف غني به د سې شنبې په ورځ د ملګرو ملتونو عمومي اسمبلۍ ته وینا وکړي او په څنګ کې به یې د امریکا له ولسمشر ډونالد ټرمپ او د پاکستان له صدراعظم خاقان عباسي سره هم وګوري.