حسین بخش صفري د ترکمنستان په کوربه توب د پنځم پړاو سالون دننه اسیايي سیالیو کې، د افغانستان لپاره د سرو زرو مډال وګاټه.
د افغانستان د المپیک کمېټې د نشراتو مسؤل منورشاه شهزاد نن یکشنبه ازادي راډيو ته وویل چې دغه مډال د رزمي لوبو د جوجېستو په برخه کې، د دغو سیالیو په لومړۍ ورځ ښاغلي صفري د افغانستان په نوم کړ.
د ترکمنستان په کوربه توب د سالون دننه اسیایي سیالۍ نن یکشنبه د ترکمنستان د ولسمشر له خوا پرانېستل شوې چې د روانې سپټمبر میاشتې تر ۲۷ مې پورې به روانې وي.
په دې سیالیو کې د اسیا او اقیانوسیه وچې څخه د ۶۲ هېوادونو نېږدې ۶ زره لوبغاړي په ۲۱ ورزشي رشتو کې لوبېږي چې له افغانستان له هم له ۱۶ ورزشي رشتو ۲۳۰ لوبغاړو پکې ګډون کړی دی.