لسمشر محمد اشرف غني نن د شنبې په ورځ له غرمې وروسته د يوه دولتي پلاوي په مشرۍ د ساینس او ټکنالوژۍ په برخه کې د اسلامي هېوادونو د همکاریو سازمان په لومړنۍ ناسته کې د ګډون په هدف، قزاقستان ته ولاړ.
د ولسمشر مرستیال ویاند نجیب الله ازاد د شنبې په ورځ ازادي راډيو ته وویل چې ولسمشر محمد اشرف غني به د دې ناستې په څنډه کې د اسلامي هېوادونو له يو شمېر مشرانو سره د ترورېزم پر وړاندې د ګډې مبارزې او یو شمېر نورو مسایلو په اړه خبرې وکړي.
ښاغلي ازاد زیاته کړه:
"جمهور رئیس به د اسلامي هېوادونو له مشرانو سره د بېلابېلو مسایلو په اړه خبرې وکړي او همدا راز به د ترهګرۍ پر وړاندې د اسلامي هېوادونو د اجماع د رامنځته کېدو په اړه هم بحثونه ولري."
د ښاغلي ازاد په خبره، ولسمشر غني به په دغه دوه ورځنې سفر کې، د اسلامي هېوادونو د همکاریو سازمان په ناسته کې وینا هم وکړي.
له ملګرو ملتونو وروسته د اسلامي هېوادونو سازمان دوهم لوی سازمان دی چې په ۱۹۶۹ میلادي کال کې جوړ شوی او د افغانستان په ګډون ۵۷ اسلامي هېوادونه یې غړیتوب لري.
په همدې حال کې یو شمېر سیاسي کارپوهان وايي چې د سعودي عربستان په ګډون اسلامي هېوادونه پر طالبانو او پاکستان ډېر نفوذ لري او کولای شي چې د سولې په برخه کې له افغان حکومت سره مرسته وکړي.
سیاسي کارپوه قدرت الله ځواک په دې اړه ازادي راډیو ته وویل:
"پرته له شکه چې سعودي عربستان پر هغو اسلامي غورځنګونو چې په اسلامي هېوادونو کې فعالیت کوي، اغیز لري چې یو له هغو غورځنګونو طالبان دي، له چارواکو سره د ولسمشر لیده کاته به د افغانستان د سولې او امنیت سره مرسته وکړي."
د ښاغلي ځواک په خبره، اوس مهال د اسلامي هېوادونو پر وړاندې جدي ننګونه د ترورېزم فعالیت دی، خو که اسلامي هېوادونو د دغې پدیدې پر وړاندې ګډه مبارزه وکړي، له شک پرته چې نتیجه به یې مثبته وي.
راپور: محمد حدیث پردېس
