د سوریې لپاره د ملګرو ملتونو ځانګړی استازی وایي، ډاډه دی چې د سوریې جګړه د ډیپلوماتیکو لارو ختمېدای شي.
اسټفان ډي مېستورا د چهارشنبې په ورځ په ژنیو کې د سوریې د حالاتو په اړه یوې خبري غونډې ته وویل چې هیله لري د استانې راتلونکې غونډه به په دې برخه کې مرسته وکړي.
دی وايي:
"زه ډاډه یم او موږ پر همدې مسئلې ټینګار کوو او کار ورته کوو چې یوه حللاره باید وي، راځئ ووایم چې دا حللاره به په ادلیب کې نوی حلب نهوي. دا هغه څه دي چې که موږ له تېر څخه تجربه اخیستې وي، نو په هره بیه چې وي غواړو مخهیې ونیول شي. د دې کار لپاره زه هیله لرم او باوري یم چې د استانې راتلونکې غونډه به پهدې برخه کې مرسته وکړای شي."
د قزاقستان په پلازمېنه استانه کې د سوریې د کړکېچ د ختمولو په هدف غونډې د ایران، روسیې او ترکیې په منځګړیتوب پر مخ ځي.
د استانې په تېره غونډه کې یادو هېوادونو د سوریې په شمال، مرکز او جنوب کې د څلورو امنیتي زونونو پر جوړېدو موافقه وکړه، خو د سوریې د حکومت مخالفینو هغه موافقه رد کړه.
د سوریې لپاره د ملګرو ملتونو ځانګړي استازي پرون ویلي چې د سوریې د جګړې په اړه به تاریخ قضاوت کوي او زیاتوي د اوس لپاره دومره ویلی شي چې د دې جګړې هېڅ لوری د جګړې د ګټلو ادعا نهشي کولای.
دا خبرې داسې مهال شوي چې د سوریې دولتي رسنیو تېره ورځ اعلان وکړ چې د سوریې پوځیانو دېرالزور ښار ته نږدې د داعش ډلې شااوخوا درې کلنه کلابندي ماته کړه.
داعش ډلې لا هم د دېرالزور ښار پر نیمایي برخه او د بل ښار رقې پر ځینو سیمو خپل کنټرول ساتلی دی.
