د چین ولسمشر او د هند صدراعظم موافقه وکړه چې دواړه هېوادونه به د دوه اړخیز اعتماد د رامنځته کېدو لپاره هلې ځلې زیاتې کړي.
چین د هند له سیال پاکستان سره ښې اړیکې لري او د هند او چین ترمنځ د خاورې پر سر لانجه هم شته.
د هند د بهرنیو چارو وزیر اس جي شنکر خبریالانو ته وویل، د چین د ولسمشر شي جین پېنګ او د هند د صدراعظم نرېندرا مودي یو ساعته غونډه د دواړو هېوادونو د ښې راتلونکې لپاره ګټوره وه.
جي شنکر زیاته کړه چې له دې لیدنې کتنې ښکاره شوه چې د دواړو هېوادونو مشران غواړي چې د پیکنګ او نوې ډېلي اړیکې ښې وي او داسې روابط د ټولو په ګټه دي.
تېره اوونۍ هند خپل پوځیان د همالیا غرونو له دوکلام پلاتیو له لوړو په شا کړل، هلته د چین پوځیانو د یوه سړک د جوړېدو چارې پیل کړې دي.
په دې سیمه کې نېږدې دوه نیمې میاشتې د دواړو خواوو ځواکونه د یوه بل په مقابل کې درېدلي وو.
د چین او هند ترمنځ له څو لسیزو راهیسې د تاوتریخوالي په ترڅ کې دغه وروستی مخالفت جدي ګڼل کېده.
د چین د دوکلام پلاتیو پر سیمه د بوتان مملکت د ملکیت ادعا لري.
د دغه واړه هېواد بهرنۍ دفاع هند په غاړې اخیستې ده.
د هند د بهرنیو چارو وزیر وویل، د نړۍ د سترو هېوادونو ترمنځ اختلافات طبیعي وي، خو دا مهمه ده چې دا ستونزې پر دوه اړخیز درناوي او د ګډو ګټو پر بنسټ هوارې شي.
د هند او چین مشرانو د دوشنبې په ماښام موافقه وکړه چې د دواړو هېوادونو پوځي او امنیتي چارواکي نېږدې اړیکې سره ولري تر څو پرې نهږدي چې وضعیت کړکېچن شي.
د اس جي شنکر په وینا دواړو مشرانو ټینګار وکړ چې په سرحدونو کې ثبات د ښو اړیکو د ودې پيلامه ده.
شي جین پېنګ او نرېندرا مودي د برېکس یا د نړۍ د پنځو پرمختلونکو اقتصادي قدرتونو د مشرانو د غونډې تر څنګ د چین په شیامن ښار کې غونډه وکړه.
د برېکس په ډله کې چین، هند، برازیل، جنوبي کوریا او روسیه غړي دي.
