د افغانستان د کرکټ بورډ مسؤلین وايي چې د شپږیزې لیګ پنځم پړوا په را روانو ۲۰ اوریزو سیالیو کې به ۳۰ بهرني روزنکي او لوبغاړي ګډون وکړي.
د کرکټ بورډ ویاند فرید هوتک نن چهارشنبه ازادي راډیو ته وویل، د کرکټ په دې سیالیو کې چې د روان میلادي کال د سپټمبر په ۱۱ مه په کابل کې پیلېږي، د پاکستان، جنوبي افریقا، وېست انډیز، زیمبابوی او د بنګله دېش د کرکټ پېژندل شوي لوبغاړي په کې لوبېږي.
ښاغلی هوتک وايي چې اوس مهال د شپږیزې لیګ کرکټ سیالیو ته د چمتووالي په هدف په کابل، ننګرهار او خوست لوبغالو کې ۶ ګډون کوونکي لوبډلې تمرینات کوي .
په پام کې ده چې د شپږیزې لیګ دا سیالۍ د روان میلادي کال د سپټمبر تر ۲۲ مې دوام وکړي.
سپین غر زمریان، کابل بازان او مس عینک اتلان هغه لوبډلې دي چې په تېرو کلنو کې يې د دې سیالیو اتلولي ګټلې ده.