د بلخ د والي عطا محمد نور او د دغه ولایت د ولایتي شورا د غړي اصف مهمند د قضیې حقیقت موندونکی کمېسیون وايي چې دوی خپلې څېړنې ولسمشرۍ ماڼۍ ته سپارلې دي.
یاد کمېسیون د پنجشنبې په ورځ دغه څرګندونې وروسته له هغې ازادي راډیو ته وکړې چې په کابل کې د بېلابېلو ولسي شوراګانو سلګونه تنه اصف مهمند ته د عدالت غوښتنې په خاطر په یوې اعتراضیه غونډه کې راټول شوي وو.
د دغه کمېسیون یوه غړي علامه په لنډ ډول وویل، د څېړنو د وروستۍ نتیجې په اړه څه نهشي ویلی، خو هغه څه چې دوی موندلي ولسمشرۍ ماڼۍ تهیې سپارلي دي.
دی وايي:
"حقیقت موندونکي پلاوي خپل راپور ولسمشرۍ ماڼۍ ته سپارلی او له دې وروسته مسؤلیت د دوی دی."
ښاغلي علامه په دې اړه زیات جزئیات ورنهکړل.
خو د دغې پېښې د حقیقت موندونکي پلاوي یوه غړي عبدالحبیب جبارخېل د یکشنبې په ورځ ازادي راډیو ته وویل چې لومړنۍ څېړنې ښيي چې اصف مهمند د بلخ د والي په امر نیول شوی دی.
د بلخ د والي ویاند منیر فرهاد هم تائید کړې وه چې اصف مهمند د بلخ د والي عطام محمد نور په امر نیول شوی و، خو ویلي یې چې له نیول کېدو وروسته د ښاغلي نور کور ته نهدی وړل شوی.
وموغوښتل په دې اړه د ولسمشرۍ ماڼۍ نظر هم واخلو خو بریالي نهشو.
دا په داسې حال کې ده چې د ولسي شوراګانو سلګونه تنه نن پنجشنبه د کابل په عیدګاه جومات کې د بلخ د ولایتي شورا د وکیل اصف مهمند په ملاتړ راغونډ شوي وو او د هغه لپارهیې د عدالت غوښتنه کوله.
د غونډې ګډونوالو ویل، که د اصف مهمند پر وړاندې عدالت پلی نهشي دوی به خپلو لاریونونو ته دوام ورکړي.
د ولسي شوراګانو د ختیځ زون استازي اجمل عمر غونډې ته وویل:
"تر کومه چې نظام د اصف مهمند پوښتنه نهوي کړې ننیې بېلګه له دې وروسته به په ولایتونو کې هم ورته غونډې روانې وي او د ولایتونو عمومي سړکونه به بندېږي، نظام تر اوسه ولې د داسې قانون ماتوونکو او بدمعاشانو پر وړاندې غلی پاتې شوی دی، نظام ولې په داسې کارونو خپلې پښې په خپله وهي."
دا څرګندونې داسې مهال کېږي چې د بلخ د ولایتي شورا وکیل اصف مهمند ادعا کړې چې تېره اوونۍ په بلخ کې د والي عطا محمد نور د کسانو لهخوا نیول شوی او شکنجه شوی دی.
هغه د پنجشنبې په ورځ په کابل کې خپلو ملاتړو ته وویل چې که د دغو خپل سریو پوښتنه ونهشي تر نړیوالو محکمو به د عدالت غوښتنه وکړي.
د بلخ د والي ویاند منیر فرهاد په کابل کې د دغې غونډې په غبرګون ازادي راډيو ته وویل چې د بلخ د والي پر وړاندې دا کسان د سیاسي کړیو لهخوا راټول شوي دي.
دی وايي:
"د هغو ادعاوو په اړه چې دوی څرګندونې کړي، موږ بلخ ته د رالېږل شوي پلاوي نتیجو ته په تمه یو، دوی چې هر څه پرېکړه وکړه موږ به د مرکز څخه د رالېږل شوي پلاوي نتیجو ته درناوی وکړو."
ښاغلی فرهاد وايي، که اعتراض کوونکي د سیاسي مسایلو ورهاخوا نورې څه ادعاوې لري د بلخ والي حاضر دی چې په محکمو کې یې ځواب ووايي.
د یادونې ده چې تر دې دمخه هم یو شمېر کړیو او اشخاصو د یادې پېښې په تړاو د عادلانه څېړنو او د حکومت لهخوا د جدي اقدام غوښتنه کړې وه.
راپور: یوسف خان ځدراڼ