د افغانستان نامتو سندرغاړې اریانا سعید وايي، د ګواښونو او خبرداریو سربېره به د افغانستان د خپلواکۍ د بېرته اخېستلو د ورځې په مناسبت په کابل کې د موسیقۍ کنسرټ ورکړي.
د اریانا سعید ګڼو مینهوالو که د شنبې په ورځ د موسیقۍ دې کنسرټ ته د ورتلو نیت کړی ځینې کسان داسې هم شته چې په کابل کې د دې افغان سندرغاړې د کنسرت له جوړېدو سره مخالف دي.
خو اریانا سعید هوډ کړې چې د امنتي اندېښنو او د ځینو کسانو د ګواښونو سربېره به په کابل کې د موسیقۍ کنسرټ جوړوي او له دې درکه ترلاسه شوې پیسې به په افغانستان کې د جګړو د تازه پېښو له قربانیانو سره په مرسته لګوي.
اریانا سعید د ټامسن رویټرز فاونډیشن ته له کابل په ټیلیفون ویلي:
"پرته له دې چې عواقبو ته یې پام وکړم، دا کنسرټ به جوړوم. "
هغې پر خپل فیسبوک پاڼه په یو ویډیويي پیغام کې ویلي: " ...نور اسلامي هېوادونه هم شته، خو موسیقي لري، هنرمن لري، تلویزون لري، خوښي او موسکا لري او د ازادۍ جشنونه هم جوړوي. موږ یې ولې ونه لرو؟"
که څه هم د امنتیي اندېښنو له کبله د دې کنسرټ ځای تر اوسه څرګند نهدی، خو نوموړی وايي، تر اوسه پورې یې څلور زره ټیکټونه پلورلي او دا د دې څرګندوی ده چې خلک له موسیقۍ سره مینه لري.
په هغو کسانو کې چې د اریانا سعید د دې کنسرټ خلاف یې غږ پورته کړی یو هم د کابل د ولایتي شورا غړی عطاالله فیضاني دی.
نوموړي رویټرز خبري اژانس ته ویلي:
"موږ به په خپله ټولنه کې نڅا او کنسرټونو ته اجازه ورنه کړو. "
د اریانا سعید په رسمي فیسبوک پاڼې کې د نوموړي پر وروستیو پوسټونو په تبصرو کې د یو شمېر مخالفتونو سربېره ګڼو کسانو د دې سندرغاړې ملاتړ کړی او ډېرو یې ژمنه کړې چې کنسرټ ته به ورشي.
اریانا سعید چې په دري او پښتو سندرې وايي، د بېلابېلو سخت دریځو ډلو او اشخاصو له خوا ورته ګواښونه او خبرداري نوي نهدي.
په دې وروستیو کې یې له هېواده بهر په یو کنسرت کې د جامو اغوستلو بڼې هم د هغو افغانانو ترمنځ تاوده بحثونه راپورته کړي و چې انلاین ټولنیزې شبکې کاروي.
رویټرز خبري اژانس وايي، د افغانستان خپلواکي چې پاچا امان الله خان په مشرۍ په ۱۹۱۹ میلادي کال کې له انګریزانو اخېستل شوې پر نورو افغانانو سربېره د افغان ښځو لپاره مهمه ده، ځکه نوموړی یو اصلاح غوښتونکی پاچا و چې په نورو اصلاحاتو تر څنګ یې په ټولنه کې د ښځو د زدهکړو او ټولنیز مشارکت په برخه کې هم اقدامات کړي وو.
اریانا سعید د رویټرز خبري اژانس ته ویلي، دا هېواد ګڼې ستونزې لري چې باید هوارې شي.
نوموړي زیاته کړې زما غږ زما خلکو ته د سولې او نجونو ته د هیلو د یو څرک استازولي کوي.
