د بلخ په والي عطا محمدنور پورې تړلیو پوځیانو د بلخ ولایتي شورا غړی اصف مهمند پرون شپه ناوخته نیولی دی.
مهمند د بلخ په هوايي ډګر کې نیول شوی دی.
د بلخ امنیه قوماندان سیدکمال سادات په سیمه کې رسنیو ته وویل چې د کورنیو چارو وزارت د سرپرست د حکم له مخې یې غوښتل اصف مهمند بېرته کابل ته واستوي خو د بلخ د والي پورې تړلیو پوځیانو د بلخ د ولایتي شورا دا غړی له ځان سره یوړ.
د بلخ د والي وياند منير فرهاد بیا تېره شپه ازادي راډيو ته وويل چې په اصف مهمند د فساد تورونه دي او هغه د عدلي ارګانونو په امر نیول شوی دی.
دی وايي:
"ښاغلى مهمند چې د ملي امنيت د څارنوالۍ او د درنو جرمونو د څارنوالۍ له خوا يې د نيولو حکم صادر شوى، د اسنادو او قراردادونو په جعل کولو تورن دى."
د بلخ والي ته نېږدې کسانو په ټولنیزو رسنیو اسناد خپاره کړي او ادعا یې کړې چې د کورنیو چارو وزارت او له اداري فساد سره د مبارزې ځانګړې څارنوالۍ د محمد آصف مهمند د نیولو امر کړی دی.
دوی ټینګار کوي چې د ښاغلي مهمند نیونه د قانون سره سم ترسره شوې ده.
د مهمند تر نیول کېدو وروسته د هغه داسې تصویرونه راوتلي چې ښيي په لاسونو کې یې ولچکونه پراته دي او یو تن چې برګه پوځي دریشي یې په تن ده تر څنګ هم ناست دی.
د بلخ والي عطا محمدنور په خپل فیسبوک پاڼې د اصف مهمند تر نیول کېدو وروسته د ملي امنیت سلاکار حنیف اتمر او د ملي امنیت عمومي رئیس معصوم ستانکزي ته په خطاب کې ویلي چې له توطیه جوړونکو پروژو سره بلخ چې نسبي امنیت او آرامي لري، مه نا آرامه کوئ.
معلومه نهده چې ښاغلي نور چې په وروستیو کې یې د ولسمشر د لومړي مرستیال جنرال دوستم او د اجرائیه رئیس د دویم مرستیال او د حزب وحدت مردم اسلامي افغانستان د رئیس محمدمحقق په ملګرتیا یې د افغانستان د نجات په نوم ائتلاف جوړ کړی ولې د حکومت دغو لوړپوړو امنیتي مقاماتو ته دا څرګندونې کړي دي.
د افغانستان د ملي امنیت شورا او د ملي امنیت ریاست په دې اړه څه نهدي ویلي.
اصف مهمند چې د بلخ د والي عطا محمد نور له سر سخته منتقدانو ګڼل کېږي یوه اوونۍ مخکې ادعا کړې وه چې د بلخ د والي په وړاندې د اسنادو د وړاندې کولو لپاره لویې څارنوالۍ ته ورغلی و.
هغه د بلخ والي په فساد او خپلو خپلوانو ته په امتیاز ورکولو تورن کړ.
د اصف مهمند ځینو پلویانو ګواښ هم کړی چې که هغه بېرته ژر خوشې نه شي د بلخ – جوزجان لویه لار به وتړي او مظاهرې به وکړي.
د رپوټونو له مخې د بلخ په هوايي ډګر کې د تېرې شپې د لانجې په خاطر سیمه کلابند شوې وه او دې کلابندۍ او ګډوډۍ څو ساعته دوام کړی و.
صفي الله ستانکزی