د افغان حکومت اجرائیه رئیس عبدالله عبدالله وايي چې اطلاعاتو ته د لاسرسي د قانون له توشیح راهیسې بیا تر اوسه د قانون تطبیق د تمو مطابق نهوو.
ښاغلي عبدالله چې د یکشنبې په ورځ یې اطلاعاتو ته د لاسرسي د ملي ستراتیژۍ پرانېستې غونډې ته خبرې کولې وویل، دا کار تر ډېره د ځينو ادارو د مطبوعاتي دفترونو لهخوا چې وړتیاوې یې لوړېدو ته اړتیا لري سخت شوی دی.
نوموړی وايي:
"دا قانون توشیح شو خو تر اوسه وینو چې ستونزې شته. موږ د ملي وحدت حکومت لهخوا د څارنې کمېسیون ته ډاډ ورکوو چې په دې برخه کې به ستونزې په ګډه حلوو، په مالي او نورو برخو کې ستونزې وې او کارونه د هیلو مطابق مخ ته نهدي تللي."
خو ښاغلي عبدالله ټينګار وکړ چې دولتي ارګانونه مکلف دي چې اطلاعات ډله بندي او تر خلکو یې ورسوي.
دا په داسې حال کې ده چې اطلاعاتو ته د لاسرسي د څارنې کمېسیون د یکشنبې په ورځ د یاد قانون د تطبیق لپاره خپله ملي ستراتیژي اعلان کړه.
د دغې ستراتیژی له مخې مسؤلین حساب ورکوونکي او عام خلک حق دا حق لري چې اطلاعات تر لاسه کړي او کمېسیون، مدني ټولنې او رسنۍ یې باید تر منځ د پله رول ولوبوي.
حق غوښتنه، پوهاوی، د لوړتیاوو لوړول او غوښتنو ته ځواب ورکول د دغې ستراتیژي نورې برخې دي.
ولسمشر محمد اشرف غني په ۱۳۹۳ لمریز کال کې اطلاعاتو ته د لاسرسي قانون توشیح او د نافذېدو حکم یې ورکړی و.
دا قانون په شپږو فصلونو او ۳۲ مادو کې راغونډ شوی چې اطلاعاتو ته د لاسرسي د څارنې کمېسیون یې اوس پر ځينو مواردو د تعدیل ټينګار کوي.
د دغه کمېسیون مشر اکرام افضلي د نوې ستراتیژي د معرفۍ غونډې ته وویل، اطلاعاتو ته د لاسرسي د قانون د تطبیق لپاره په ټوله کې یو بدلون ته اړتیا ده.
دی وايي:
"په ټولو برخو کې د پرمختګ لپاره د دولتي او عامو بنسټونو مشران باید خپل مسیر بدل کړي، هغه داسې چې بشري مالي او نورو برخو ته اجازه ورکړي چې د اطلاعاتو قانون ته عملي بڼه ورکړي او په دغه شان د پوهاوی لوړول یوه اړتیا ده چې موږ به د کمېسیون له لارې دا کار وکړو. "
د اطلاعاتو او فرهنګ وزارت بیا په دې باور دی چې د قانون له توشیح سره سم افغان حکومت اطلاعاتو ته پر وخت د لاسرسي په برخه لېوالتیا ښودلی او ورته ژمن دی خو د دوی په وینا یو شمېر ستونزې د دغه قانون د طبیق پر وړاندې خنډ جوړوي.
د اطلاعاتو او فرهنګ وزارت اداري مرستیالې، سیده مژګان مصطفوي دې غونډې ته وویل، په اکثرو ادارو کې د اطلاعاتو د رسونې مرکزونه نه دې جوړې شوي، د دولتي ادارو ویبپاڼې سمې نهدي فعاله او هغه چې مرکزونه چې یادې څانګې لري هم سم فعالیت نهکوي.
خو اغلې مصطفوي هیله وښوده چې د نوي ستراتیژي په تطبیق سره چې حکومت یې ملاتړی دی تر ډېره دا ستونزې هوارې شي.
راپور: یوسف خان ځدراڼ