جنرال جان نیکلسن چې ولسمشر ډونالډ ټرمپ یې د لېرې کولو وړاندیز هم کړی د افغانستان په روانه جګړه کې افغان پوځ برلاسی بولي او وايي، دا پوځیان په ډېر ویاړ د خپل هېواد دفاع کوي.
جنرال جان نیکلسن له شاوخوا یو نیم کال راهیسې په داسې شرایطو کې په افغانستان کې د امریکايي او بهرنیو ځواکونو مشري کوي چې تر قوماندې لاندې سرتېرو شمېر یې د تېرو څو کلونو په نسبت په لسګونه واره کم دی.
جان نیکلسن د افغان پوځ د معلولو لوبغاړو له ټیم یا "ماتې نه مننونکي" ټیم سره په لیدنه کې وویل، افغان پوځیانو خپل امتحان ورکړی او بریالي وتلي دي.
هغه پرون افغان ماتې نه مننونکي ټيم ته په خطاب وویل:
"د افغان ملي پوځ معلول غړي. زما دې خوا ته د همدې ماتې نه مننونکي ټیم غړي دي چې تمه ده د ماتې نه مننونکو په لوبو کې چې په سېپټمبر میاشت کې په ټورنټو کې کېږي برخه واخلي. دا کسان چې تاسو ګورئ دوی خپل امتحان ورکړی او بریالي وتلي دي. د افغانستان پوځ نن جګړه په خپله مخته وړي او په دې کار ویاړي."
د افغان پوځ "ماتې نه مننونکی" ټیم د ګڼو هغو بهرنیو پوځیانو په ډله کې وستایل شو چې پرون په کابل کې د بهرنیو ځواکونو په عمومي قومانداني کې سره ټول شوي وو.
د افغان ماتې نه مننونکي ټیم هم په خپله ټویټرپاڼه د "غښتلي افغان" ، "د افغانستان لپاره" او "ماتې نه مننونکی افغان" شعارونه لیکلي دي.
د افغان پوځیانو د معلولو لوبغاړو ټیم شپږ غړي به د سېپټمبر په میاشت کې په کاناډا کې لوبې وکړي.
افغانستان او ۱۶ نور هېوادونه سږ کال د ماتې نه مننونکو لوبو درېیم پړاو ته خپل ۵۵۰ معلول پوځیان استوي.
د معلولو پوځیانو د لوبو ترسره کوونکي سازمان د افغان ټیم د مشر ډګروال محمد اشرف په حواله لیکلي چې ټول د سولې لپاره په ګډه مبارزه مخته وړي.
د ماتې نه مننونکو لوبو اساس د بريټانیا د شاهي کورنۍ غړي شهزاده هري په پوځ کې د دفاع په وخت د ټپي پوځیانو د درنښت په مناسبت په ۲۰۱۴ میلادي کال کې کېښود.
شهزاده هري په خپله له ۲۰۰۵ تر ۲۰۱۵ کاله په پوځ کې دنده وکړه او د افغانستان په جګړه کې یې هم برخه اخېستې ده.
معلول پوځیان د افغان چارواکو له خوا هم نه دي هېر شوي.
افغان ولسمشر محمد اشرف غني د ځوانانو د نړیوالې ورځې په مناسبت جوړې شوې غونډې کې پرون د افغان پوځیانو مېړانه وستایله.
نوموړي وویل:
"د افغان امنیتي او دفاعي ځواکونو په لیکو کې زموږ له ځوان نسل، د هغوی له قربانۍ، سرښندنې او مېړانې مننه کوو."
د افغانستان د دفاع لپاره په داسې حال کې د افغان پوځیانو مېړانه هم د ناټو د غوڅ ملاتړ عمومي قوماندان او هم ولسمشر اشرف غني ستایي چې امریکا متحده ایالتونو یو ځل بیا افغان چارواکو ته د هر راز همکارۍ ډاډ ورکړی دی.
د افغانستان ملي امنیت شورا پرون په یوه بیان کې ویلي چې د امریکا د ملي امنیت سلاکار مکمسټر د افغانستان د ملي امنیت سلاکار محمد حنیف اتمر سره په خبرو کې ژمنه وکړه چې د امریکا دولت او خلک له ترهګرۍ سره د مبارزې په برخه کې د افغانانو له مبارزې او هڅو کلک ملاتړکوي.
د امریکا د ملي امنیت سلاکار په داسې حال کې افغانانو ته د همکارۍ ډاډ ورکړی چې تمه ده ژر ولسمشر ډونالډ ټرمپ افغانستان ته د اضافي سرتیرو د استولو پرېکړه او په لویه کې خپله سټراټيژي اعلان کړي.
صفي الله ستانکزی