د افغانستان د کورنیو چارو پخوانی وزیر عمر داوودزی اندیښنه لري چې په هېواد کې د قومونو د بېلولو او د افغانانو ترمنځ د مذهبي، ژبني، قومي او داسې نورو تعصبونو د رامنځته کولو دسیسې پیل شوي دي.
ده وویل، دا دسیسي چې په سیمه او هېواد کې دننه د ځینو کړیو لهخوا پیل شوي، د ترورېزم په څېر خطرناکې دي، خو افغان ولس به اجازه ورنهکړي چې د دغو دسیسو پیلوونکي خپلو اهدافو ته ورسېږي.
داوودزي زیاته کړه:
"هېواد له یوې دسیسې سره مخ دی، موږ شاهدان یو چې په دې وروستیو کې د نامعلومو کړیو لهخوا تعصب ته لمن وهل کېږي. ښايي ځینې ناپوهې کورني کړۍ د خپلو لنډ مهالو سیاسي ګټو په خاطر، د دغو دسیسو ښکار شوي وي، خو موږ د خپل ملت روحیه ښه پېژنو، د تعصب پر وړاندې به داسې مبارزه وکړي چې د ترورېزم پر وړاندې یې کړې ده."
ښاغلي داوودزي دا خبره د پنجشنبې په ورځ په کابل کې د څه باندې ۳۰۰ هغو ځوانانو په ستاینغونډه کې وکړه چې د ۱۳۹۶ لمریز کال کې یې د کانکور په ازموینه کې ښې نمرې خپلې کړي دي.
ښاغلي داوودزي وویل، موږ ترورېزم، طالب او داعش نهشي ختمولی خو که ویښ ونه اوسو، تعصب به مو ختم کړي.
په جوړې شوې غونډه کې درې هغه محصلینو ته چې په کانکور کې یې تر نورو زیاتې نمرې خپلې کړې وې، وستایل شول.
مسؤلینو د کابل پوهنتون د روان کال د کانکور ازموینه شفافه وګڼله.
په ورته وخت کې د کابل پوهنتون رئیس حمیدالله فاروقي وویل، پوهنتونونه د علم، تحصیل، د اکاډمېکو معلوماتو د حاصلولو او مسلکي ظرفیتونو د لوړولو ځای دی، خو په خواشینۍ سره په تېرو څو کلونو کې د کابل پوهنتون یو شمېر محصلین د ځینو متعصبو کړیو د سلیقې ښکار شول.
ښاغلي فاروقي پر دغو نویو محصلینو ټینګار وکړ چې خپل ټول پام، علم او تحصیل ته واړوي او له هر ډول تعصب نه ډډه وکړي.
نوموړي وویل:
"د خرافاتو، تعصبونو او د افغانستان د دښمنانو پر وړاندې چې هڅې کوي زموږ ځوانان د خپلو شومو هیلو په خاطر استعمال کړي، پر وړاندې یې مبارزې ته ملا وتړئ."
په دې وروستیو کې په دې اړه اندېښنې ډېرې شوې چې ګوندې یو شمېر کورني او بهرنۍ کړۍ په افغانستان کې د دغه هېواد د خلکو ترمنځ بېلابېلو تعصبونو ته لمن وهي.
خو د حکومت مشرانو، ولسي جرګې، مشرانو جرګې او یو شمېر سیاسیونو په وار- وار له خلکو غوښتي چې خپل یووالی وساتي او د ورته دسیسو ښکار نهشي.
راپور: خان محمد سیند