تېره شپه د افغانستان په دوو جنوبي ولایتونو کندهار او زابل کې ۲۵ وسلهوال طالبان او ۲ پولیس وژل شوي ۲۳ وسلهوال طالبان او ۲ پولیس ټپیان شوي دي.
- کندهار ولایت
د کندهار د پولیسو ویاند ضیا دُراني ازادي راډیو ته وویل چې تېره شپه وسلهوالو طالبانو هممهاله د کندهار پر درېیو ولسوالیو میانشین، ارغستان او شاه وليکوټ کې د ملي او سرحدي پولیسو پر پوستو حملې کړي چې پر مهاليې ۱۷ وسلهوال او دوه پولیس وژل شوي ۲ پولیس او ۱۸ وسلهوال ټپیان شوي دي.
د دُراني په وینا په ارغستان ولسوالۍ کې د سرحدي او ملي پولیسو پر پوستو په حمله کې ۸ وسلهوال وژل شوي او ۱۲ نور ټپیان شوي.
د نوموړي په وینا په دغې جګړه کې یو ملي او یو سرحدي پولیس وژل شوی او دوه پولیس ټپیان شوي دي.
دُرانی وايي:
"اته وسلهوال په ارغستان کې وژل شوي او ۱۲ نور مرګوني ټپیان دي، دوی د سرحدي او ملي پولیسو پر پوستو حمله وکړه چې زموږ یو سرحدي پولیس او یو ملي پولیس شهیدان او یو سرحدي او یو ملي پولیس ټپیان شوي دي."
دُرانی وايي، په عین وخت کې ۵ وسلهوال په میانشین ولسوالۍ او ۴ په شاه وليکوټ ولسوالۍ کې د امنیتي ځواکونو سره په مخامخ جګړه کې وژل شوي او شپږ نور ټپیان دي.
د دُراني په وینا دغه وسلهوال هغه مهال د امنیتي ځواکونو په متقابلو ډزو کې ووژل شول کله چې يې د شپې ناوخته د امنیتي ځواکونو پر پوستو حملې وکړې.
دغهراز نن سهار د کندهار په میوند ولسوالۍ کې د سړک غاړې ماین چاودنه کې یو ملکي کس وژل شوی او دوه نور ټپیان شوي دي.
د کندهار د پولیسو ویاند ضیا دُراني ازادي راډیو ته وویل، د ملکي کسانو یو ټونس موټر د کلي څخه ولسوالۍ ته پر لاره و چې د وسلهوالو لهخوا پر خښ شوي ماین برابر شو.
- زابل ولایت
بلخوا د زابل چارواکي وايي چې تېره شپه په څلورو هوايي بریدونو کې چې افغان او بهرنیو ځواکونو په ګډه ترسره کړي ۸ وسلهوال وژل شوي او پنځه نور ټپیان دي.
د زابل د والي ویاند ګل اسلام سیال ازادي راډیو ته وویل، دغه وسلهوال د شېنکۍ ولسوالۍ په سیوري سیمه کې وژل شوي او ټپیان دي.
د سیال په وینا وژل شویو وسلهوالو په سیمه کې د امنیتي ځواکونو پر پوستو د حملې لپاره چمتووالی نیوه چې د هوا څخه په نښه شول.
وسلهوالو طالبانو تر اوسه د دې ټولو امنیتي پېښو په اړه تبصره نهده کړې.
راپور: صادق رښتینی
