د کندز سیمه ییز چارواکي په یاد ولایت کې د خواجه مشهد په نوم د نجونو پر یو ښوونځی د ناټو د غوڅ ملاتړ ماموریت ځواکونو لخوا د هوايي برید خبر ورکوي.
د خواجه مشهد ښوونځی د کندز ښار ختیځ لورې ته د والي د دفتر په ۵۰۰ مترۍ کې موقعیت لري.
د دغه ښوونځي مدیر حشمت الله صدیقي نن شنبې ازادي راډیو ته د دغې پېښې په اړه داسې وویل:
"نن سهار ۴:۲۰ د امریکايي هوايي ځواکونو له خوا زموږ پر ښوونځي بمب غورځول شوی دی چې له کبله یې ښوونځي او د سیمې شااوخوا کورنو ته یې سخت مالي تاوان رسولی دی."
په ورته وخت کې د کندز د پوهنې ریاست مشر محمد رستم جبارخېل د دغې خبرې پخلی کوي وايي چې په افغانستان کې د ناټو د غوڅ ملاټر ماموریت هوايي ځواکونو د خواجه مشهد پر ښوونځي سهواً برید کړی چې په پایله کې ښوونځي ته همدارنګه په سیمې کې شااوخوا کورونو ته مالي زیان رسېدلي دی.
نوموړي زیاته کړه:
"ما په دې اړه د فرقې له قوماندان سره خبرې وکړې، هغه راته وویل چې دوی د شپې د کندز ښار اړوند شمال ختیځ لورې ته خپل پوځي عملیات پیل کړي او دغه ښوونځي د ناسمو معلوماتو له مخې ویشتل شوی دی."
په همدې حال کې د کندز ښار د خواجه مشهد د سیمې خلک بیا وايي چې د دغه هوايي برید له کبله د خواجه مشهد ښوونځي سربېره د دغې سیمې یو شمېر کورونو ته هم سخت مالي تاوان رسېدلی دی.
د دغې سیمې مشر عبدالکریم بلوڅ او یوه تن زیانمن په دې اړه ازادي راډیو ته وویل:
"دغه سیمه د ښار منځ او یو هستوګنه سیمه ده او د خواجه مشهد پر مکتب د بمب غورځولو له کبله د خلکو کورونو ته هم زیان رسېدلي دی، دښمن چېرته دی او دوی کوم ځایه په نښه کوي او دغه سیمه د والي دفتر څخه ۵۰۰ متره واټن لري."
"دغه پېښه باید په جدې توګه وڅېړل شي، ځکه دوی ولې هستوګنه سیمې پر بمب وېشتلي ده، څو په راتلونکي کې د دغه شان پېښو مخه ونيول شي او دغه شااوخوا ټولو کورونو ته مالي زیان اوښتی دی."
بل خوا د کندز د والي ویاند سید محمود دانش له ازادي راډیو سره د خبرو پرمهال وویل چې په افغانستان کې د ناټو د غوڅ ملاتړ ماموریت هوايي ځواکونو د خواجه مشهد پر ښوونځي یې د ناسمو معلوماتو له مخې برید کړی دی.
ښاغلي دانش زیاته کړه چې اړوندو ارګانونو په دې اړه خپلې څېړنې پیل کړي دي او وروسته به د دغې پېښې جزئیات له رسنیو سره شریکه وي.
نوموړي زیاته کړه:
"نن شپه دولتي ځواکونو عملیات پیل کړي وو، داسې پلان وو چې د خواجه غلطان ښوونځي شاه باید وویشتل شي ځکه هلته دښمن ځای نیولی وو، خو په کوردیناتو کې د نومونه اشتباه شوي ده چې له کبله یې د خواجه مشهد ښوونځي شاه وېشتل شوې او تشنابونه یې وران کړي دي، دغه اشتباه د ناسمو کوردیناتو له کبله رامنځته شوي ده."
د والي ویاند وايي چې په دغه پېښه کې د سیمې درې تنه اوسېدونکي د کورونو د ښېښو ماتېدو له کبله سطحي ټپیان شوي دي.
په همدې حال کې د کندز سیمه ییز چارواکي وايي چې تېره شپه د افغان ګډو ځواکونو د کندز مرکز پورې اړوند د خواجه غلطان، چپرمه او د حضرت سلطان سیمو کې د وسله والو مخالفینو د ځپلو په هدف یې پراخ هوايي او ځمکنې تصفیوي عملیات پیل کړي او لاهم په سیمې کې جریان لري.
دا چې په افغانستان کې د ناټو د غوڅ ملاټر ماموریت هوايي ځواکونو په کندز ښار کې پر خواجه مشهد ښوونځي ولې هوايي برید کړی، لا تراوسه پورې روښانه نه ده.
راپور: اجمل ارین