د سوریې د بشري حقونو د څار لندن مېشته ډله وايي، د اسلامي دولت د وسلهوالې ډلې لهمنځهیې "تائید شوي معلومات" ترلاسه کړي چې د دې ډلې مشر ابوبکر البغدادي مړ شوی دی.
د سوریې د بشر حقونو د څار د ډلې مشر رامي عبدالرحمن د سې شنبې په ورځ په یوې اعلامیه کې وویل، بغدادي د سوریې په ختیځ کې د دیرالزور په ولایت کې مړ شوی، خو نوموړي نهدي ویلي چې نوموړی کله او څنګه مړ شوی.
بلخوا د امریکا پوځ او سپینه ماڼۍ دواړه وايي چې نهشي کولای د داعش د ډلې د مشر ابوبکر البغدادي مړینه تائید کړي.
د ولسمشر ډونالد ټرمپ یو لوړپوړي سلاکار سبسشن ګورکا "Sebastian Gorka" پرون سې شنبه امریکايي رسنیو ته وویل، د امریکا متحده ایالات دمګړۍ دا راپورونه نهشي تائیدولی.
امریکايي جنرال سټیفن ټاونسینډ "Stephen Townsend" چې د داعش پر ضد د جنګېدونکي نړیوال ائتلاف مشري کوي وايي، داسې هېڅ معلومات نهلري چې له مخې یې د البغدادي مړینه تائید او یا رد کړي.
نوموړي له بغداده د وېډیو کنفرانس له لارې خبریالانو ته وویل، د بغدادي په اړهیې بېلابېل راپورونه اورېدلي، خو د نوموړي د برخلیک په اړه دقیق نهپوهېږي.
کُردي او عراقي ځواکونو هم دمګړۍ د داعش د ډلې د مشر د مړینې راپورونه نهدي تائید کړي.
پرون سهار د عراق یو ټلوېزیوني چینل د داعش د یوې سرچینې په حواله د البغدادي د مړینې راپور ورکړی و.
یوه میاشت مخکې د روسیې د دفاع وزارت ویلي وو، باور لري چې د مې د میاشتې پر ۲۸مه نېټهیې د سوریې د دیرالزور ولایت په رقه ښار کې د بمبارۍ پر مهال د اسلامي دولت د وسلهوالې ډلې مشر ابوبکر البغدادي وژلی دی.
په ټولنیزو رسنیو کې هغو اکاونټونو چې د داعش له وسلهوالې ډلې سره تړلي بلل کېږي تر اوسه په دې اړه کومه تبصره نهده کړې.
د یادونې وړ ده چې تر دې مخکې هم د ابوبکر البغدادي د مرګ په اړه څو ځلې خبرونه او راپورونه خپاره شوي دي.
