افغان ولسمشر د کوچني اختر د لمانځه له ادا کولو وروسته د پخوانیو اختریزو پیغامونو په پرتله وسلهوالو مخالفینو ته متفاوت پيغام درلود.
محمد اشرف غني په دغه نوي پيغام کې وسلهوالو مخالفینو ته په خطاب کې وویل چې د سولې د خبرو لپاره د حکومت شرطونه واضح دي.
محمد اشرف غني ټینګار وکړ چې له افغان حکومت سره خلک، نړۍ او د اسلامي هېوادونو اجماع او ملاتړ شته.
نوموړی وايي:
"وسلهوال افرادو ته په واضح توګه وایم چې تاسې وخت نه لرئ، فیصله وکړئ که افغانان یې سوله وکړئ که نه یې، لکه چې نو په وروستیو اوونیو کې زموږ امنیتي او دفاعي ځواکونو بشپړه مېړانه ښودلې بیا به یې هم وښيي."
ښاغلي غني همدا شان له حرمین شریفین سره نېږدې حمله په سختو ټکو وغندله او له مسلمانانو یې وغوښتل چې د کعبې شریفې ساتنه وکړي.
دا لومړی ځل نهدی چې په اختریزو پیغامونو کې له وسلهوالو مخالفینو غوښتل کېږي چې د سولې له بهیر سره یوځای شي.
بلکې له دې وړاندې هم افغان لوړ پوړو حکومتي چارواکو په وارــ وار له وسلهوالو مخالفینو دا ډول غوښتنې کړې، خو وسلهوالو مخالفینو تل په جګړې ټینګار کړی.
د روژې په مبارکه میاشت کې هم وسلهوالو مخالفینو خپلو حملو ته زور ورکړی و، د راپورونو له مخې له ۲۰۰۱ میلادي کال راپه دې خوا دا میاشت تر ټولو خونړۍ میاشت بلل شوې چې سلګونه افغانانو ته په کې مرګ ژوبله واوښتله.
په ورته وخت کې یو شمېر افغان کارپوهان وسلهوالو مخالفینو ته د ولسمشر نوی خبرداری جدي بولي او ټینګار کوي چې حکومت دغه خبرداری جدي ونیسي.
د دغو کارپوهانو له ډلې ودیر ساپي ازادي راډیو ته وویل، که حکومت دا ځل هم جدي عمل ونه کړي د خلکو پر وړاندې به یې باور ته زیان ورسېږي.
دی وايي:
"دا چې ولسمشر وايي، تاسې ته وخت کم دی بیا به درسره خبرې نه کېږي، له پوځي او سیاسي پلوه دوه معناوې لري، له پوځي پلوه دا معنی لري چې تر اخري سلګۍ درسره جنګېږو، ترڅو ورک مو کړو، له سیاسي پلوه که له پوځي لارې راته مغلوب شوې، په راتلونکې کې به په سیاسي برخه کې ګډون نه درکول کېږي، اوس به وګورو چې دده خبرې تر کومه ځای عملي کولای شي، اوس خو یو شدید خبرداری دی."
له بل پلوه د چارو بل کارپوه انتظار خادم په دې باور دی د سیمې یو شمېر هېوادونه له وسلهوالو مخالفینو نه په استفادې په افغانستان کې د جګړې اور ته لمن وهي او خپلې ګټې په کې لټوي.
د ښاغلي خادم په وینا هغوی په هېڅ صورته دې ته چمتو نهدي چې د افغان حکومت وسلهوال مخالفین د سولې خبروته کېنه وي.
راپور: رحمت الله افغان