د امریکا د پوځ یوه لوړ پوړي چارواکي ویلي چې د امریکا متحده ایالات هڅه کوي، د روسیې له پوځ سره ارتباطي لین بیا ورغوي.
د امریکا د لویو درستیزانو د کمېټې مشر جنرال جوزف ډانفورډ ویلي، په سوریې کې د امریکا او روسیې تر منځ دغه ارتباطې لین د دواړو لورو د ځواکونو د خوندیتوب لپاره حیاتي وسیله ده.
دی وایي، پهداسي حال کې چې دواړه لوري په یوه خاوره کې جلا جلا عملیات کوي، نو د تصافي ټکرونو د خطر مخه له همدې لارې نیول کیدای شي.
ډانفورډ ویلي، دوی هڅه کوي په راتلونکو ساعتونو کې د پوځي او دیپلوماتیکو لارو دغه اختلافات حل او د شخړو سطح ټیټه کړي .
دغه امریکایې جنرال د سوریې د الوتکې د لوېدو په اړه په امریکا کې رسنیو ته وویل:
"پېښه د دې اوونۍ په پای کې د سوریې د رژیم پلوه ځواکونو د یوه ترکي وسلهوال تر حرکت وروسته وشوه ، سو ۲۲ ډوله جنګي دغه الوتکه په سیمه کې والوته، موږ هره هڅه وکړه چې ټولو لورو ته خبرداری ورکړو چې نور نېږدې رانهشي او وروسته قوماندان پرېکړه وکړه چې دا هغو ځواکونو ته چې موږ یې ملاتړ کوو یو ګواښ دی او اقدام یې وکړ، یوازیني اقدامات چې موږ په سوریې کې د رژیم د ملاتړ ځواکونو په وړاندې کړي او موږ په ښکاره ویلي، هغه دوه پېښي دي چې د خپل ځان د دفاع لپاره مو کړي دي."
د روسیې دفاع وزارت وړاندې ویلي وو، لهدې کبله چې پنتاګون ونشو کولای د سوریې د سو ۲۲ ډوله جنګي الوتکې تر راغورځولو د مخه، هغه ارتباطي اړیکه وکاروي چې دوی د عملیاتو د همغږۍ لپاره موافقه ورباندې کړې وه، نو ځکه دغه اړیکه ځنډوي.
د روسیې د دغه اختلاف سره سره، جوزف ډانفورډ وایي، په تېرو څو ساعتونو کې دغه اړیکه کارول شوې ده.
روسیې دغه راز د دوشنبې په ورځ خبرداری ورکړی و چې د دوی هوایي دفاعي سېستم به په مرکزي سوریې کې د امریکا په مشرۍ ایتلاف د ټولو الوتکو لارو تعقیبول پیل کړي.
دغه خبرداري پنتاګون اړ کړ چې د دوی په خبره، د خپلو پوځي هوایې پرسونل د خوندیتوب په هدف ځیني عملي اقدامات وکړي او د خپلو الوتکو ځای یې بدل کړی دی.
دغه ارتباطي لین په قطر کې د امریکا د پوځي افسرانو عملیاتي مرکز، په سوریې کې د روسي پوځیانو له مرکز سره نښلوي .