د افغانستان د کورنیو چارو وزارت وایي، په کابل کې د یوه تښتول شوي افریقايي تبعه د خوشې کولو لپاره هڅې پیل شوي دي.
د دغه وزارت د ویاند د دفتر سرپرست نجیب دانش د دوشنبې په ورځ ازادي راډیو ته وویل، دا څېړنې هم پیل شوي چې دغه بهرنی تبعه څنګه تښتول شوی دی.
ښاغلي دانش وویل:
"د افریقايي هېوادونو یو تبعه چې کرنې وزارت ته یې کار کاوه، پرون شاوخوا اته بجې په څلورمه کارته کې تښتول شوی، د کابل امنیتي ټیم هڅې پیل کړي چې معلومه کړي، دی څنګه تښتول شوی، د پېښې په اړه څېړنې روانې دي او غواړو چې نوموړی ژر تر ژره خوشې او خپلې دندې ته ور ورګرځي."
د افغانستان د کرنې او مالدارۍ وزارت سره لهدې چې د خپل دغه کارکوونکي د نوم له ښودلو ډډه کوي، خو وايي چې تښتول شوي کس د باغدارۍ او مالدارۍ په ملي پروګرام کې د قراردادي په توګه له دوی سره کار کاوه.
د کرنې وزارت ویاند لطفالله راشد ازادي راډیو ته وویل، دغه بهرنی تبعه هغه مهال وتښتول شو چې په څلورمه کارته کې د خپل هستوګنځي څخه د کرنې وزارت په لور روان و.
ښاغلي راشد وویل:
"د کرنې وزارت قراردادي کارکوونکی چې کور یې په څلورمه کارته کې دی، غوښتل یې دندې ته لاړ شي، پر لاره د ناپېژاندووسلهوالو لهخوا تښتول شوی، ده د مالدارۍ او باغدارۍ په برخه کې د کرنې له وزارت سره کار کاوه."
ځینو منابعو ازادي راډیو ته ویلي چې تښتول شوی په افریقايي هېوادونو کې د کینیا تبعه و.
د کابل ښار په لوېدیځه برخه کې پخوا تر دې هم ورته پېښې شوې دي.
شاوخوا یوه میاشت مخکې ځينو ناپېژاندو وسلهوالو د کابل ښار د دارالامان په سیمه کې د میرسي په نوم پر یوه بهرني دفتر برید وکړ چې په نتیجه کې یې یوه جرمنۍ ښځه ووژل شوه او یوه فنلنډۍ و تښتول شوه.
تر اوسه د دغې فنلنډۍ ښځې برخلیک څرګند نهدی.
سربېره پر دې، تېر کال په افغانستان کې د امریکايي پوهنتون د دوو تښتول شویو استادانو برخلیک هم تر اوسه نهدی روښانه.
اوس پوښتنه دا ده چې کومو لاملونو په کابل کې د بهرنیانو تښتول زیات کړي دي؟
په دې اړه د کورنیو چارو د وزارت پخوانی مرستیال میرزا محمد یارمند وايي، کوم دفترونه چې بهرني کارکوونکي لري، باید د خپلو دغو کارکوونکو پېژندګلوي، په امنیتي ارګانونو کې ثبت کړي.
ښاغلی یارمند زیاتوي:
"د هغه د هستوګنې، دفتر او د تګ راتګ لوری باید ځانګړی شي او بله دا چې په دې برخه کې باید یو میکانېزم جوړ شي چې پولیس مسؤلیت احساس کړي او د داسې کسانو د دندو اړوند او یا د کورنیو چارو وزارتیې امنیت ونیسي."
د یارمند په خبره، کله کله بهرني اتباع د امنیت په برخه کې بېپروايي کوي او ځانونه په امنیتي ادارو کې نه ثبتوي.
نوموړی د کابل پولیس د تښتول شویو په خلاصولو مکلف ګڼي.
راپور: خان محمد سیند.