د حزب اسلامي مشر ګلبدین حکمتیار وايي چې افغانستان د تصمیم نیونې یوې ملي اجماع ته اړتیا لري چې دی یې په لټه کې دی.
ګلبدین حکمتیار زیاته کړه چې د افغانستان د ستونزو د حل لپاره یوه نوې طرحه لري چې له مخې یې باید د ټولو ډلو په شمول یوه ملي اجماع جوړه شي.
ښاغلي حکمتیارد پنجشنبې په ورځ په کابل کې یوې خبري غونډې ته وویل چې دی اوسنی نظام د یوه واقعیت په توګه مني چې ناکامول یې د هېچا په ګټه نهدي خو د جګړو په ختمولو کې ورسره مرسته کول د ټولو کار دی.
ده وویل چې دی د روانو ستونزو د حل لپاره د داسې یوې اجماع په لټه کې دی چې سولې ته غاړه ایښودونکي طالبان او د اوسني نظام مخالف او موافق ټول لوري پهکې شامل وي.
نوموړی وايي:
"موږ چې کومه طرحه لرو هغه له مخکنیو سره توپیر لري، د اوس لپاره په دولت کې شامل، له دولته بهر، د دولت ملاتړي او یا ناراضه باید په خپلو منځو کې سره کښیني، د طالبانو سره د سولې د خبرو د څرنګوالي ترڅنګ ستر ملي مسایل وڅېړي، موږ غواړو چې د تصمیم یوه مرجع پیدا کړو نن په دې برخه کې تشه شته چې باید ډکه شي."
ښاغلی حکمتیار وايي، دا مجمعه به تبلیغاتي، تفاهمي، مشورتي او سیاسي غونډه نهوي بلکې پریکړې به یې الزامي وي.
نوموړي هیله وښوده چې د روژې تر پایه د تصمیم نیونې دا ادرس جوړ او په کار پيل وکړي.
ښاغلی حکمتیار دا څرګندونې داسې مهال کوي چې په افغانستان کې دا وخت ګڼ سیاسي جریانونو او اجماع ګانې فعاله دي چې تر ډېره مشورتي او انتقادي رول لوبوي.
د حزباسلامي مشرګلبدین حکمتیار په دې وروستیو کې د حکومت او حزباسلامي ترمنځ د سولې تر هوکړې وروسته کابل ته راغی او دا یې تر راتګ وروسته لومړنی خبري کنفرانس و.
د یادونې ده چې ښاغلی حکمتیار دا څرګندونې په داسې حال کې کوي چې په پلازمېنه کابل کې د حکومت پر خلاف اعتراضونو زور اخیستی او سیاسي ناندرۍ زیاتې شوي دي.
د سیاسي چارو کارپوه ودیر صافی وايي چې د افغانستان ستونزو حل ته یوازې افغانان حل لارې موندلای شي او د دې کار لپاره د ګوندونو او سیاسي جریانونو ملي اجماع او همغږي خورا مهمه ده.
دی وايي:
"حکمتیار په ښه وخت کې اقدام کړی که دا خلک سره راټول شي هر څه کیدلای شي، موږ که ملي اجماع ونه لرو سیمهییزو او نړیواله اجماع هېڅ معنا نه لري ټوله نړۍ زموږ ستونزې نهشي حلولای ترهغې چې افغانان خپلو کې سره یو موټی نهشي."
ولسمشر مانۍ او ولسي جرګې هم په هېواد کې د وروستیو خونړیو پېښو وروسته د ملي اجماع د جوړېدو خبره کړې ده ویلي چې د روانو حالاتو په اړه د افغانانو په مشوره باید مناسب اقدامات ترسره شي.
راپور:یوسف خان ځدراڼ