د کندهار سوداګر د سپینبولدک-چمن د دروازې د تړلو په غبرګون کې وايي چې سوداګري له سياسته یو جلا سکټور دی او باید نور د سیاستونو قرباني نهشي.
د سپینبولدک-چمن لار د تېرو ۲۱ ورځو راهیسې تړلې ده.
پر ډیورند کرښه د افغان او پاکستاني ځواکونو تر منځ له نښتې نن ۲۱ ورځې تېرېږي چې د سپینبولدک او چمن تر منځ د دوستۍ دروازه د هر راز تګ راتګ پر مخ تړلې ده.
که څه هم افغان چارواکو په سیمه کې د پاکستاني مسئولینو سره څو ځلې خبرې وکړې خو محسوسېدونکې پايله ورڅخه تر لاسه نهشوه.
د هېواد د سوداګرۍ او صنایعو خونې مسؤلین وايي چې له پاکستان سره د سپینبولدک ترانزیټي لارې د تړلو له امله افغان سوداګرو ته ډېر مالي زیانونه اوښتي دي.
د دغې ترانزيټي لارې د تړل کېدو له امله تر ټولو ډېر زيان د کندهار سوداګرو ته رسېدلی.
هغوی د چهارشنبې په ورځ د يوې غونډې پر مهال پاکستان د نړيوالې سوداګرۍ د اصولو په ماتولو تورن کړ.
د کندهار د سوداګرۍ خونې رئیس حاجي نصرالله ذهير وایي، د لارو تړل د دې پر ځای چې ستونزې او اختلافونه کم کړي لا يې ډېروي او باید چې سوداګرۍ ته سياسي رنګ نور ورنهکړل شي.
نوموړی وايي:
"سیاست د حکومت کار دی، نه د تاجر کار، موږ دا خبره پاکستاني سوداګرو ته هم کړې سوداګر باید له سیاسته لیرې وساتل شي د دروازې تړل نور هم تاوان لري."
په غونډه کې د افغانستان او پاکستان د سوداګرۍ ګډې خونې مرستيال محمد یونس مهمند هم پاکستان د سوداګرۍ د نړيوالو اصولو څخه په سرغړونه تورن کړ او د پاکستان دا ادعا يې بېبنسټه وبلله چې ګواکې افغان دولت د سپينبولدک چمن لار تړلې ده.
مهمند وویل، که پاکستان نور هم د دروازې تړلو ته دوام ورکړي نو د سارک سازمان له لارې به پر دغه هېواد فشار راولي.
نوموړي زیاته کړه:
"پاکستان هېڅ تړون ته ژمن نهدی دوی د نورو هېوادونو سره هم اختلافات لري خو د هغو سرهیې سرحد نهدی تړلی دوی زموږ سره د سوداګري په برخه کې هېڅ تړون ته ژمن نهدي."
د هېواد د سوداګرۍ خونې چارواکي وايي چې پخوا د تورخم او سپینبولدک له ترانزیټي لارو څخه په ورځ کې د درېیو میلیونه ډالرو په ارزښت صادرات او واردات کېدل خو اوس په دغې کچه کې د پام وړ کموالی راغلی او افغان سوداګرو د مځني اسیا له ځینو نورو هېوادونو سره سوداګري پیل کړې.
راپور: محمد صادق رښتینی