د افغانستان د وسلهوالو ځواکونو په اړه د ولسمشر ټرمپ تر څرګندونو وروسته د دغه هېواد د مشرانو جرګې اداري پلاوی دې ته خوشبینه کړی چې امریکا د افغانستان حقانیت درک کړی دی.
د یادې جرګې دوهم مرستیال محمد اصف صدیقي د دوشنبې په ورځ ازادي راډیو ته وویل، اوس نړۍ ته ثاتبه شوې چې ترورېزم په پاکستان کې دي.
نوموړی وايي:
"ولسمشر ټرمپ چې د پاکستان په اړه کوم شعارونه درلودل اوس یې د عملي کولو په حال کې دی، ټرمپ دا درک کړه چې اصلي ستونزه په پاکستان کې ده او د افغانستان په ګډون اکثره هېوادونه له دغه ادرسه زیانمن شوي دي."
دا په داسې حال کې ده چې د امریکا د متحده ایالاتو ولسمشر ډونالډ ټرمپ د سعودي عربستان په مرکز ریاض کې پهخپلې تاریخي وینا کې د افغان امنیتې او دفاعي ځواکونو څخه ستاینه وکړه چې د داعش او نورو تروریستانو په وړاندې په مبارزه کې یې ډېرې قربانۍ ورکړي دي.
ښاغلي ټرمپ د اسلامي نړۍ له مشرانو څخه وغوښتل چې د تروریستي ډلو په وړاندې مبارزه نوره هم جدي کړي او د مالي سرچینو د وچولو لپاره یې هم هڅې وکړي.
افغان حکومت په وار-وار دا ویلي چې افغانان د ترورېزم په وړاندې د جګړې په لومړۍ کرښه کې دي او ترورېزم په پاکستان کې روزل کېږي او وسلې ورکول کېږي.
په افغانستان کې چې د تروریستانو له لوري کومې لوی حملې ترسره کېږي او د سلګونو کسانو ژوند اخلي هم مسؤل یې پاکستان یاد شوی دی.
دا په داسې حال کې ده چې پاکستان هرکال د ترورېزم سره د مبارزې په نامه په میلیونونه ډالر له امریکا او نورو هېوادنو څخه اخلي.
له دې وړاندې هم د امریکا د متحده ایالاتو څو لوړ پوړو چارواکو له پاکستان غوښتي وه چې له ترورېزم سره جدي مبارزه وکړي.
په ورته وخت کې، د سیاسي چارو کارپوه فضل احمد معنوي وایي چې د پاکستان یو شمېر ملاتړي هېوادونه اوس هم د پاکستان په ګټه تبلیغات کوي.
دی وايي:
"زما باور دا دی چې د پاکستان په اړه د امریکا نوې حکومت سخت بې باوره شوی دی، خو هغه لابي ګري چې سعودي درلوده احتمالًا ښاغلي ټرمپ د پاکستان په اړه منفي لید لوري نهدی نیولی."
ښاغلی معنوی ټینګار کوي چې د ترورېزم د لهمنځه وړلو لپاره باید د دې پديدي پر ټولو ملاتړو هیوادونو فشار راوړل شي.
راپور: سباوون کاکړ