د سرپل ولایت اوسېدونکي د کوکنار کښت له زیاتوالي شکایت کوي او وايي چې وسلهوال طالبان د کوکنارو د عواید په ترلاسه کولو سره ځان ته پوځي امکانات برابروي.
د سرپل ولایت اوسېدونکي وايي چې تر ټولو ډېر په سوزمه قلعه، کوهستاناتو او صیاد ولسوالیو کې د کوکنارو کښت نسبت بل هر وخت ته زیات شوی دی.
د یادو سیمو اوسېدونکي وايي چې د کوکنارو د کښت زیاتوالی د دې سبب شوی چې د دولت مخالف وسلهوال خپل جنګي امکانات د تاریاکو څخه په تر لاسه شویو پیسو برابر کړي.
د سرپل اوسېدونکي ساحل او منیب یې په اړه وايي:
"سوزمه قلعه، صیاد او کوهستاناتو ولسوالیو کې د کوکنارو کښت زیات شوی او نور زراعتي کښتونه عواید نهلري په همدې دلیل د کوکنارو کښت زیات شوی او موږ هم کوکنار کرلي دي."
"په سرپل کې د کوکنارو کښت زیات شوی خاصتاً هغه سیمو کې چې د مخالفو وسلهوالو تر ولکې لاندې وي، دلته مخالفین هڅه کوي چې د تاریاکو کښت ترویج کړي."
په همدې حال کې د سرپل والي ظاهر وحدت هم وايي چې د طالب وسلهوالو د ولکې لاندې سیمو کې د کوکنارو کښت زیات شوی او هغوی ترې د خپل تجهیز لپاره کار اخلي.
د سرپل والي ظاهر وحدت د طالب وسلهوالو تر ولکې لاندې سیمو کې د کوکنارو د کښت په اړه وايي:
"په دې کې شک نهشته چې د مخالفو وسلهوالو په قلمرو کې هم کوکنار زیات کرل شوي دي، موږ نهیو توانېدلي چې مخنیوی یې وکړو او دا یو څرګند حقیقت دی."
یوازې سرپل ولایت نهدی چې اوسېدونکي یې د کوکنارو د کښت له زیاتوالي شکایت کوي د بلخ، جوزجان او سمنګان اوسېدونکي هم په خپلو سیمو کې د کوکنارو د کښت له زیاتوالي شکایت کوي.
په دې اړه تر اوسه وسلهوالو طالبانو څه نهدي ویلي.
راپور: مجیبالرحمن حبیبزی