د سوډان ولسمشر عمر البشیر چې په ډله ییزه وژنه تورن دی د سعودي د پایتخت ریاض په راتلونکې سرمشریزه کې چې د امریکا ولسمشر په کې برخه اخلي، ګډون کوي.
د سوډان د بهرنیو چارو وزیر د چهارشنبه په ورځ په جنیوا کې خبریالانو ته وویل ولسمشر عمر البشیر به د جمعې په ورځ سعودي عرسبتان ته لاړ شي او په هغې غونډه کې به برخه واخلي چې د امریکا ولسمشر په کې ګډون کوي.
ابراهیم الغندور وویل، سوډان غواړي چې له متحده ایالاتو سره خپلې اړیکې نورماله کړي.
خو خرطوم کې د امریکا سفارت ویلي چې دا لېرې خبره ده چې ولسمشر ټرمپ به له بشیر سره وویني، ځکه واشنګټن د هغه چا له سفر ملاتړ نه کوي او نه ورته بلنه او اسانتیاوې ورکوي چې تر عدلي تعقیب لاندې وي.
سره له دې چې د هاګ د جرمونو نړیوالې محکمې په ۲۰۰۸ میلادي کال کې د سوډان د ولسمشر عمرالبشیر د نیولو حکم ورکړی خو نوموړی پر لهپسې نړیوال سفرونه کوي.
بشیر چې په ۱۹۸۹ میلادي کال کې د اسلامپالو د یوې کودتا په نتیجه کې واک ته ورسېد، د سوډان د شمال دارفور سیمې د جګړې په تړاو چې لسګونه زره کسان په کې ووژل شول، په جنګي جنایتونو، بشر ضد جرمونو او ډله ییزه وژنو تورن دی.
د سوډان ولسمشر پر ځان لګیدلي تورونه رد کړي او د دې هېواد د بهرنیو چارو وزیر وايي، د هاګ محکمه د سیاسي وسیله په توګه استعمالېږي.
ابراهیم الغندور وايي، د هاګ د جرمونو نړیواله محکمه د سپین پوستو لهخوا د افریقایانو د تورنولو په هدف جوړه شوې ده.
بل لورته د هاګ د محکمې څارنوال امافاتو بن سوده له ټولو هېوادونو غوښتي چې د سوډان د ولسمشرپه نیولو کې ورسره همکاري وکړي.
دې محکمې د ملګرو ملتونو د امنیت له شورا هم غوښتي چې په دې برخه کې ګامونه واخلي.
ټاکل شوې ده چې د متحده ایالاتو ولسمشر ډونالډ ټرمپ د روانې اوونی په پای کې سعودي عربستان ته لاړ شي، نوموړی به له اسرائیل هم کتنه وکړي او بیا به روم او بروکسل ته وخوځېږي.