د ولسي جرګې او ولسوالیو شوراګانو د انتخاباتو ترسره کېدو لپاره که څه هم سږ کال اټکل شوی خو د انتخاباتو خپلواک کمېسیون وايي که د روانې میاشتې تر پایه د انتخاباتو بودجه ورنهکړل شي په روان کال کې انتخابات نهترسره کېږي.
د یاد کمېسیون غړي او ویاند عدالبدیع صیاد د سې شنبې په ورځ په کابل کې خبریالانو ته وویل چې دوه میاشتې مخکې یې حکومت ته د بودجې، ټکنالوژۍ څخه د ګټې اخیستنې او انتخاباتي حوزو په اړه طرحې سپارلي خو تر اوسه وروستۍ شوې نهدي.
ښاغلي صیاد زیاته کړه:
"که د دغې میاشتې تر اخره زموږ د بودجې او لګښتونو ستونزه حل نهشي زه فکر نهکوم چې په روان کال کې دې موږ انتخابات ترسره کړو ځکه چې ټاکنې مقدماتي پړاوونو ته ضرورت لري او لږ تر لږه ۱۸۰ ورځې مخکې باید موږ د انتخاباتو ورځ اعلان کړو."
ښاغلی صیاد وايي چې د انتخاباتو خپلواک کمېسیون که څه هم تر اوسه د ټاکنو اټکلي وخت نهشي بیانولای خو دغه کمېسیون ډېر عملیاتي کارونه بشپړ کړي دي.
د افغانستان د اساسي قانون له مخې د ولسي جرګې او ولسواليو شوراګانو انتخابات باید د ۱۳۹۴ کال د میزان په میاشت کې ترسره شوي وی.
له دې وړاندې افغان دولت په روان ۱۳۹۶ لمریز کال کې د دغو انتخاباتو د ترسره کېدو ژمنه او د انتخاباتو خپلواک کمېسیون بیا تېر کال د کب په میاشت کې د انتخاباتو د ترسره کېدو د نېټې ټاکلو اراده کړې وه خو د ډېرو ستونزو له کبله لا هم دا نېټه نهده ټاکل شوې.
د انتخاباتو د خپلواک کمېسیون د معلوماتو له مخې د ولسي جرګې او ولسوالیو شوراګانو د انتخاباتو لپاره په اټکلي ډول ۲۲۰ میلیونه ډالره بودجه په کار ده.
د ولسمشر مرستیال ویاند دوا خان مینهپال د سې شنبې په ورځ ازادي راډیو ته وویل حکومت له مرسته کوونکو سره په اړیکه کې دی څو انتخاباتو ته هر اړخیز کار شوی وي.
نوموړی وايي:
"د ډونرانو سره په مسلسله توګه لس غونډې شوي او دې ټولو مجلسونو هدف دا دی، هغه څه چې د انتخاباتو لپاره د حکومت مسؤلیت کېږي ترسره کړي."
د انتخاباتو کمېسیون وايي چې د انتخاباتي حوزو د ارزیابۍ او د کارکوونکو استخدام لپارهیې تازه د حکومت څخه څه د پاسه یو میلیون ډالره بودجه ترلاسه کړې خو وايي چې د اصلي بودجې اړتیا هم باید پوره شي.
له دې ټولو سره یو شمېر انتخاباتي بنسټونه انتقاد کوي چې حکومت د انتخاباتو د ترسره کېدو لپاره لازمه وړتیا او اراده نهلري چې له کبلهيې انتخابات ځنډني شول.
خو ولسمشرۍ ماڼۍ او د انتخاباتو خپلواک کمېسیون بیا ورته انتقادونه ردوي وايي چې حکومت په ټوله معنی د انتخاباتو د ترسره کېدو لپاره هڅې کوي.
راپور: یوسف خان ځدراڼ