د نړیوال بانک او د افغانستان د اقتصاد وزارت له تازه راپور سره سم، په سلو کې ۳۹ افغانان د بېوزلۍ تر کرښې لاندې دي.
نړیوال بانک او د افغانستان د اقتصاد وزارت دوه عامله د افغانانو د بېروزګارۍ او د بېوزلۍ تر کرښې د ټیټ ژوند سبب بولي، یو له افغانستانه د څه باندې یو لک پوځیانو وتل او بل د مرستو کمېدل او د اکثرو پروژو درېدل.
د نړیوال بانک په راپور کې چې د دوشنبې په ورځ خپور شو، لیدل کېږي چې د ۲۰۱۱ او ۲۰۱۲ میلادي کلونو تر منځ په سلو کې ۳۶ افغانان د بېوزلۍ تر کرښې لاندې وو، خو په ۲۰۱۳ او ۲۰۱۴ میلادي کلونو کې دا فیصدي ۳۹ ته ورسېده.
په افغانستان کې د بېروزګارۍ اندازه هم په سلو کې ۲۶ ښودل شوې او ویل شوي چې بېکارۍ کلیوال زیات زیانمن کړي دي.
د افغانستان د اقتصاد وزارت سلاکار سهراب بهمن وايي، د ۲۰۱۳ او ۲۰۱۴ میلادي کلونو په پرتله په تېرو دوو کلونو، یعنې ۲۰۱۵ او ۲۰۱۶ میلادي کال کې د افغانستان اقتصادي وده زیاته شوې ده.
ده ازادي راډیو ته د بېروزګارۍ د وضعیت او بېوزلۍ په اړه وویل:
"په مجموع کې په سلو کې ۳۰ افغانان د بېوزلۍ تر کرښې لاندې یا تر هغې اندازې یا کرښې لاندې ژوند لري چې ټاکل شوې ده او اکثره بېوزلي په کلیو کې ده. بېروزګاري هم د فقر په شان کلیو کې ډېره ده ځکه چې تاسو پوهېږئ چې بېوزلي او بېکاري سره تړلي دي. که اوزګاره وې اتومات بېوزلي ورسره پیدا کېږي."
د اقتصاد وزارت سلاکار همداراز تائید کړه، په افغانستان کې تر یو میلیون زیات خلک کار نهلري.
ښاغلي بهمن په عین حال کې وویل چې د افغانستان اقتصادي وده په وروستیو دوو کلونو کې زیاته شوې ده.
د نړیوال بانک په راپور کې ویل شوي چې د ۲۰۱۵ او ۲۰۱۶ میلادي کلونو تر منځ د افغانستان اقتصادي وده تر یو نیم فیصد پورې وه.
د نړیوال بانک اټکلونه ښيي چې د افغانستان اقتصادي وده به تر ۲۰۳۰ میلادي کال پورې په تدریجي ډول په سلو کې ۵ ته ورسېږي.
د اقتصاد وزارت سلاکار سهراب بهمن هیله ښيي چې سږ کال به د افغانستان اقتصادي وده په سلو کې ۳ ته ورسېږي.
نوموړي زیاته کړه:
"له نېکهمرغه سږ کال اقتصادي وده په سلو کې ۲ ده او تمه ده چې ۳ فیصدو ته ورسېږي. سږ کال هڅه شوې چې په بېوزلي کې ۳ فیصده زیاتوالی کم شي."
نړیوال بانک وايي، د بېروزګارۍ له کبله تر ټولو زیات زیان کلیوالو افغانانو لیدلی.
