د کندهار ښار په څلورمه حوزه کې د پولیسو او وسلهوالو ترمنځ نښته د دوو حمله کوونکو او یوه ماشوم په وژل کېدو پای ته ورسېده.
چارواکي وايي چې حمله کوونکي د ښځو په چادریو کې یوې ودانۍ ته وختل او پر پولیسو يې حمله وکړه.
دغه حمله دقیقاً د چهارشنبې په ماښام شپږ بجې پیل شوه.
د کندهار د څلورمې حوزې امر سردار ولي نازک په سیمه کې ازادي راډیو ته وویل چې دوه وسلهوال چې چاودېدونکي مواد یې په بدن پورې تړلي وو، د کندهار ښار اړوند د څلورمې امنیتي حوزې د فقیر بابا په کوڅه کې یوې ودانۍ ته پورته شول او پر پولیسو يې ډزې پیل کړې.
د نازک په وینا تر شاوخوا یو ساعت مقاومت وروسته یو حمله کوونکي په ودانۍ د خپل چاودیدونکو موادو د چاودنې پر مهال او دوهم د پولیسو په ډزو سره ووژل شو.
د حوزې د امر په وینا په دغه نښته کې پولیسو ته تلفات نهدي رسیدلي دوه حمله کوونکي او یو ماشوم وژل شوی او یو بل ملکي ټپي شوی دی.
نوموړی وايي:
"دوه انتحاریان چې د ښځو چادري يې ا غوستې وې زموږ پر پولیسو يې ډزې وکړې یوه انتحاري په خپله ځانته چاودنه ورکړه، بل زموږ د پولیسو له خوا ووژل شو."
غلام نبي چې په دغه پېښه کې ټپي شوی او دا مهال په روغتون کې تر درملنې لاندې دی ازادي راډیو ته د سترګو لیدلی حال داسې بیان کړ:
"ما دلته په دواخانه کې دوا را اخېسته چې ډزې پیل شوې، یوه مرمۍ زما په پښه کې لګیدلې."
وسلهوالو طالبانو تر اوسه په دې اړه څه نهدي ویلي.
دا په کندهار کې تر درېيو میاشتو نسبي ارامۍ وروسته لومړی حمله ده چې په کم شمېر تلفاتو سره پای ته ورسېده.
راپور : محمدصادق رښتینی
پخواني:
نن چهارشنبه د کندهار ښار د څلورمې امنیتي حوزې سیمه کې دوو ځانمرګو برید کوونکو د پولیسو د تالاشۍ پر پوسته د برید له امله یو ولسي وګړی وژل شوی او بل ټپي دی.
د کندهار د څلورمې امنیتي حوزې امر سردار ولي د پېښې په سیمه کې ازادي راډیو ته ویلي چې د چهارشنبې ماښام په شپږ بجو دوو ځانمرګو برید کوونکو د چادریو نه په استفادې د کندهار ښار د ښوونکو د عالي موسسې ترڅنګ د یوه نانوايي د دوکان دوهم منزل ته وختل او له هغه ځایه یې د پولیسو د تالاشۍ پر پوسته ډزې پیل کړې چې د ماښام تر اووه نیمو بجو یې ادامه درلوده.
ښاغلي سردار ولي وویل چې یوه ځانمرګي ځانته چاودنه ورکړه او بل د پولیسو په ډزو کې ووژل شو.
د نوموړي په خبره پېښه کې یو ماشوم وژل شوی او یو بل ټپي دی.
د پېښې مسؤلیت هېڅ کومې وسله والې ډلې په غاړه نه دی اخیستی.
دا په داسې حال ده چې نن د چهارشنبې په ورځ سهار نېږدې اته بجې د کابل ښار د نهمې امنیتې حوزې اړوند د شش درک ته څېرمه د یوه ځان مرګي برید له امله اته ولسي وګړي ووژل شول او پنځه ویشت نور ټپیان شول.