د لاسرسي لېنکونه

د امریکا او روسيې ولسمشران د سوريې پر جګړې سره غږېږي


سپینه ماڼۍ وايي، د امریکا ولسمشر ډونالد ټرمپ او د روسیې ولسمشر ولادیمیر پوتین به نن د سوريې د کورنۍ جګړې په اړه ټیلیفوني خبرې وکړي.

واک ته تر رسېدو وروسته د امریکا ولسمشر ډونالد ټرمپ تر اوسه دوه ځله له خپل روسي سیال ولادیمیر پوتین سره خبرې کړي.

سپینه ماڼۍ وايي، د دواړو ولسمشرانو په نننۍ ټیلیفوني مکالمه کې د سوريې د جګړې په اړه خبرې کېږي.

متحده ایالات د سوريې حکومت د وسله‎والو مخالفینو ملاتړ کوي او روسیه بیا د سوريې د ولسمشر بشارالاسد کلک پلوی دی.

روسیه د سوريې د ولسمشر بشارالاسد کلک پلوی دی.
روسیه د سوريې د ولسمشر بشارالاسد کلک پلوی دی.

ډونالد ټرمپ او ولادیمیر پوتین په داسې وخت کې له یو بل سره غږېږي چې ولسمشر ټرمپ تېره میاشت د سوريې یوه پوځي اډه په لیرې واټن ویشتونکو کروز توغندیو وویشتله.

امریکا او متحدان‌يې وايي، پر سوريې دا برید د هغې کیمیاوي حملې په عکس‌العمل کې شوی چې په ادلب ښار کې يې شااوخوا ۸۰ ملکي وګړي ووژل.

روسیه بیا دا نه‌مني چې د بشار الاسد ځواکونو دې په ادلب کې کیمیاوي وسله استعمال کړې وي او ټینګار کوي چې یا دا د بشارالاسد د حکومت پر ضد دسیسه ده او یا هم د سوريې ځواکونو هغه زېرمه په نښه کړې چې وسله‎والو په‌کې کیمیاوي ګاز ساتلي وو.

بل لور ته د جرمني صدراعظمه انګلا مېرکل نن د روسيې په ساحلي ښار سوچي کې له ولسمشر پوتین سره ویني او د اوکراین او سوريې د حالاتو په اړه به ورسره خبرې وکړي.

انګلا مېرکل نن ساحلي ښار سوچي کې له پوتین سره ویني.
انګلا مېرکل نن ساحلي ښار سوچي کې له پوتین سره ویني.

په همدې حال کې د روسيې د بهرنیو چارو وزارت ویلي چې د دې هېواد د بهرنیو چارو وزیر سرګي ‎لاوروف به د روانې مې میاشتې په ۱۰مه نېټه په الاسکا کې له خپل امریکايي سیال رکس ‎ټېلرسن سره غونډه وکړي او د سوريې د جګړې په اړه به خبرې وکړي.

د مسکو د کارنیګي څېړنیز مرکز مشر ډیمیټري‎ ترینین وايي، که څه هم د روسيې مشر ولادیمیر ‎پوتین د مسکو او برلین تر منځ د اړیکو د نورماله کېدو ملاتړ کړی، خو د پوتین او مېرکل له نننۍ غونډې د زیات پرمختګ تمه نه‌کېږي.

XS
SM
MD
LG