د کندز ولایتي شورا وايي چې دې ولایت کې په روان کال کې د جګړو او ناامنیو له کبله څه باندې ۱۰۰۰ کورنۍ د کندز ښار اړوند سیمو څخه له خپلو کورونو څخه بېځایه شوي دي.
دغه کورنۍ په داسې حال کې له خپلو سیمو څخه بېځایه کېږي چې دوه اوونۍ کېږي د دې ولایت د ښار اړوند څنډو کې افغان امنیتي ځواکونو د وسلهوالو مخالفینو د ځپلو په هدف د پامیر"۱" په نوم تصفیوي عملیات پیل کړي دي.
د کندز د ولایتي شورا رئیس امرالدین ولي په دې اړه ازادي راډیو ته وویل:
"تر اوسه داسې عملیاتونه هم نهدي شوي چې د کندز شااوخوا سیمې له طالبانو تصفیه کړي، څو خلک بېرته خپلو سیمو ته ولاړ شي همدارنګه داسې اړینې مرستې هم له بېځایه شویو کورنیو سره نهدي شوي."
ښاغلی ولي زیاتوي چې دوی له روانو عملیاتو څخه راضي نهدي، ځکه له درې کالو راهیسې په دې ولایت کې په بېلابېلو نومونو پوځي عملیاتونه ترسره شوي، خو تر اوسه بېځایه شویو کورنیو ته د بېرته تګ زمینه نهده برابره شوې.
دا چې بېځایه شوې کورنۍ اوسمهال له څه ډول ستونزو سره مخ دي، دوو تنو یې په دې اړه ازادي راډیو ته وویل:
"شیر ګل یم، موږ د دې جګړه مارانو له لاسه در په دره شوي یو، هرڅه مو له لاسه ورکړي او تر اوسه له موږ سره چا مرسته هم نهده کړې."
"سربلند یم، له اتمانزویو راکډه شوی یم، یو اندازه مرسته راسره شوې، خو بسنه نهکوي."
دغه بېځایه شوي خلک له دولته غواړي څو د دوی سیمې د وسلهوالو طالبانو له شتونه تصفیه کړي چې بېرته خپلو سیمو ته ستانه شي او له خپلو کرنیزو ځمکو څخه په ښه توګه څارنه وکړي.
په همدې حال کې د کندز د ګډونوالو او راستنېدونکو چارو رئیس عبدالسلام هاشمي بیا وايي:
"د جګړو له کبله څه باندې ۸۰۰ کورنۍ سږ کال د کندز له بېلابېلو سیمو څخه بېځایه شوي او تر اوسه موږ پر څه باندې ۸۰ کورنیو باندې مرستې وېشلي او د بېځایه شویو کورنیو سروې هم جریان لري."
بلخوا د کندز د امنیه قوماندانۍ د امنیت امر سفر محمد اکبري بیا وايي چې د روانو عملیاتو په پایله کې دوی درې کلي د طالبانو له شتونه تصفیه کړي او لا هم په سیمه کې عملیات دوام لري.
نوموړی وايي:
"تاسې شاهد یاست چې پنجشیري قُشلاق، د قوماندان سردار او د فیض محمد کلی د دښمن له وجوده تصفیه شوي او عملیات لاهم جریان لري او زموږ ځواکونو د پر مخ تګ په حال کې دي."
د یادونې وړ ده چې دغه کورنۍ د کندز ښار اړوند کلیو لکه د الچین، حضرت سلطان، تلوکه، ورته بلاقي، عربان، چپرمه، خواجه پاک، پنجشیری قشلاق، اتمانزی او د ملا سردار سیمو څخه بېځایه شوي دي او اوسمهال له سختو ستونزو سره لاس او ګرېوان دي.
راپور: اجمل ارین