د لاسرسي لېنکونه

یکشنبه ۲۸ لړم ۱۳۹۶ کابل ۰۶:۳۷

پنټاګون: سوریه او عراق کې د داعش ضد عملیاتو ۳۵۲ ملکيان وژلي


د امریکا دفاع وزارت "پنټاګون" په عراق او سوریه کې د داعش پر ضد، د ائتلافي قواوو په هوايي عملیاتو کې د ملکي تلفاتو شمېره خپره کړه.

د پنټاګون په وینا، عراق او سوریه کې د اسلامي دولت په نوم وسله‌والې ډلې یا داعش پر ضد د ائتلافي قواوو په هوايي عملیاتو کې لږ تر لږه ۳۵۲ ملکي وګړي وژل شوي دي.

د پوځ په وینا، دا کسان په ۲۰۱۴ میلادي کال کې د ائتلافي قواوو د هوايي کمپاین له پېل راهیسې وژل شوي دي.

خو د ملکي تلفاتو دا شمېره چې د امریکا دفاع وزارت پرون یکشنبه په یوه اعلامیه کې خپره کړې، تر هغو شمېرو ډېره ټيټه ده چې یو شمېر خپلواکې ډلې یې څرګندوي.

د بېلګې په ډول، د اېروارس "Airwars" په نوم یوه خپلواکه ډله وايي چې عراق او سوریه کې د ائتلافي قواوو د هوايي عملیاتو له پېل راهیسې تر ۳۰۰۰ زیات ملکي وګړي وژل شوي دي.

په خبرپاڼه کې د امریکا دفاع وزارت ویلي:

"موږ په غیر عمدي ډول، د ملکي وګړو پر وژل کېدو ډېر خواشیني یو او د دې حملو له قربانیانو او د هغوی له کورنیو سره خواخوږي لرو."

د امریکا پوځ ویلي، د هوايي حملو پر هر مورد کې له لازم احتیاطه کار اخیستل شوی خو بیا هم ملکي وګړي، په غیر قصدي ډول، د دې حملو قرباني شوي دي.

د امریکا په مشرۍ د نړیوال ائتلاف ځواکونو په ۲۰۱۴ میلادي کال کې تر هغه وروسته چې داعش په عراق او سوریه کې زیاتې سیمې ونیولې، د دې ډلې پر ضد هوايي عملیات پېل کړل.

د پوځ په وینا، له هغه راهیسې یوازې عراق کې پنځه امریکايي پوځیان، له داعش سره په ځمکنۍ مبارزه کې وژل شوي دي.

د امریکا دفاع وزارت روانه اوونۍ د عراق په موصل ښار کې چې د داعش پر ضد سخته جګړه روانه ده، د سړک غاړې بم چاودنه کې د یوه امریکايي عسکر د وژل کېدو خبر ورکړ.

د موصل د بېرته نیولو لپاره د امریکا د ځانګړو عملیاتو ۱۰۰ عسکر د کُردي ملېشو او د عراق د پوځ په ملاتړ جنګېږي.

د عراق په نورو برخو کې هم سلګونه امریکايي عسکر د داعش پر ضد عملیاتو کې د عراقي قواوو ملاتړ کوي.

امریکا په ۲۰۱۱ میلادي کال کې په عراق کې خپل مأموریت پای ته ورساوه خو د داعش د حملو له زیاتېدو سره‌یې یو شمېر پوځيان بېرته هغه هېواد ته واستول.

خو د امریکا حکومت سوریې ته د خپلو پوځيانو له استولو ډډه کړې او یوازې د داعش پر ضد پر هوايي حملو یې اکتفا کړې ده.

XS
SM
MD
LG