د لغمان والي عبد الجبار نعیمي د حزباسلامي له مشر ګلبدین حکمتیار سره وکتل او د ولسمشر د استازي په توګه يې نوموړي ته هرکلی ووایه.
له افغان دولت سره د سولې د موافقې له لاسلیک کولو وروسته دا لومړی رسمي کتنه ده چې ګلبدین حکمتیار يې له یوه افغان چارواکي سره کوي.
د لغمان د والي له دفتره خپره شوې اعلامیه وايي چې ښاغلي نعیمي او ګلبدین حکمتیار د افغانستان پر مهمو مسئلو خبرې وکړې او هیله يې څرګنده کړه چې له افغان حکومت سره د حزباسلامي د مشر د سولې موافقه به د افغانستان د جګړې د پای ته رسېدو پیلامه وي.
د لغمان والي د دولت پر وسلهوالو مخالفینو غږ کړی چې د سولې لپاره د حزباسلامي لاره تعقیب کړي.
د لغمان د والي دفتر ویلي د حزباسلامي مشر ګلبدین حکمتیار په دې کتنه کې له دولت سره د هر اړخېزې همکارۍ ډاډ ورکړ .
د لغمان چارواکو تردې مخکې ویلي چې ګلبدین حکمتیار به د جمعې په ورځ په یوې غونډه کې څرګند شي خو دا غونډه شنبه ته وځنډول شوه.