د ارزګان ولایت د یو شمېر ولسوالیو امنیه قوماندانان وايي، له تېر یو کال راهیسې يې د ولسوالیو لارې له مرکز ترینکوټ سره تړلې دي، خو ولایتي ادارې ورته هېڅ توجه نهده کړې او نههم لازم اکمالات ورته رسېدلي.
د دهراوود ولسوالۍ امنیه قوماندان شاه محمد د چهارشنبې په ورځ ازادي راډيو ته وویل چې ولسوالۍ له ډېرې مودې راهیسې وسلهوالو طالبانو محاصره کړې، خو دولت ورته مهمات نهلېږي او نهيې هم د محاصرې د خلاصون په موخه څه کړي دي.
نوموړي له ولایتي ادارې څخه غوښتنه وکړه چې یادې لارې ورته خلاصې کړي او یا دې هم اکمالات ورته وکړي.
شاه محمد زیاته کړه:
"زموږ دولس میاشتې پوره شوي چې په ولسوالۍ کې محاصره پاتې یو، موږ ته نه یوه دانه موټر او نههم د موټر یوه دانه پرزه استول شوې ده، مهمات خو بېخي نهلرو."
له دي سره د ارزګان ولایت د چنارتو ولسوالۍ امنیه قوماندان اختر محمد هم ورته څرګندونې لري.
نوموړي زیاته کړه:
"د ولسوالۍ په سطحه موږ ته ۱۵۰۰ د پیکا مرمۍ راستول کېږي په دغو مرمیو موږ څنګه د دښمن مخنیوی وکړو، تېل مو نهشته اعاشه مو نهشته، موږ څه وکړو."
دا په داسې حال کې ده چې د مسؤلینو په خبره له تېرو اتو میاشتو راهیسې د ارزګان ولایت مرکز ترینکوټ او ټولې ولسوالۍ د وسلهوالو طالبانو تر کلکې محاصرې لاندې دي او ۹۰ سلنه خاورهيې د وسلهوالو طالبانو تر ولکې لاندې ده.
په ورته وخت کې د ارزګان ولایت امنیه قوماندان مل پاسوال غلام فاروق سنګري بیا د ولسوالیو د امنیه قوماندانانو دغه ادعاوې په کلکه ردوي.
نوموړی وايي، ټولو ولسوالیو تهيې پر خپل وخت پوره او په کافي اندازه مهمات استولي دي او په خبرهيې چې وخت پر وخت د دوی د غوښتنې پر مهال د اړتیا وړ توکي ورته رسېدلي دي.
سنګري زیاته کړه:
"موږ یو فورم لرو چې د هغه فورم پر اساس ټول مهمات توزېع کوو، دا مهمات چې موږ يې دوی ته استوو هغه څه کېږي، زه ساعت په ساعت د ټولو ولسوالیو په اړه معلومات لرم چې څومره جګړه پهکې کېږي، که چېري د اضافه مهماتو اړتيا شوه موږ يې ورته استوو."
سنګري دا هم وویل دوی پلان لري چي ډېر ژر به د ټولو ولسوالیو د لارو خلاصولو عملیات هم پیل کړي.
پر همدې مهال د افغانستان د کورنیو چارو وزارت د ویاند د دفتر سرپرست نجیب دانش هم د دهراوود او چنارتو ولسوالیو د امنیه قوماندانانو څرګندونې ردوي او وايي چې دوی د ارزګان ټولو ولسوالیو ته هم میاشت او هم درې ورځې مخکې هر ډول ټول اکمالات کړي دي.
د یادونې وړ ده چې په ارزګان ولایت کې له تېرو ۱۷ ورځو راهیسې د خالد په نوم پوځي عملیات پیل شوي، خو د مسؤلینو په خبره چې یو کېلو متر سیمه هم له وسلهوالو طالبانو څخه نهده تصفیه شوې.
راپور: شریفالله شرافت