د بلخ ولایت د مدني ټولنې ګڼ شمېر غړو د ننګرهار ولایت د اچین ولسوالۍ په مامند دره کې د داعشیانو پر پټن ځایونو باندې د امریکايي ځواکونو له بمي حملې ملاتړ وکړ او له دولته غواړي چې د ترهګرۍ په وړاندې جدي مبارزه وکړي.
د بلخ د مدني ټولنو د اتحادیې لسګونه غړو د سې شنبې په ورځ مزارشریف کې د یوې خبري غونډې په ترڅ کې ننګرهار ولایت کې پر داعشیانو د امریکا هوايي ځواکونو حمله وستایله او ويې ویل چې د هېواد بېلابېلو سیمو کې دې پر برحاله تروریستي ډلې ورته حملې ترسره کړي.
دوی وویل، د بهرنیو ځواکونو له هر هغې بمي حملې ملاتړ کوي چې د افغان دولت په توافق سره پر تروریستانو ترسره شي.
د بلخ مدني فعالانو په دې اړه یو پرېکړهلیک هم ولوست چې لومړي بند کې داسې راغلي وو:
"موږ له هر هغه اقدامه د ترهګرو او د افغانستان د خلکو د دښمنانو د نابودۍ په خاطر وي او دا کړنې د ملي او نړېوالو قوانینو او توافقاتو پر اساس د دولت سره په همغږۍ ترسره شي او خلکو ته یې ګټه ورسېږي، ملاتړ کوو."
د بلخ د مدني فعالانو په باور چې ورځ تر بلې هېواد کې د بهرنیو تروریستانو او ترهګرو حضور مخ په زیاتېدو دی او یادې مسئلې د هېواد ثبات او امنیت ته ګواښ متوجه کړی دی.
دوی افغانستان کې له دېره بهرني ځواکونو څخه غواړي چې د نړېوالو توافقاتو په پام کې نیولو سره د داعشیانو او افغان دولت نورو وسلهوالو مخالفینو په وړاندې لازم نظامي اقدامات ترسره کړي.
د بلخ مدني فعالان افغانستان ته د مرستندویه هېوادونو څخه غواړي چې د امنیتي سرتېرو د تجهیز لپاره پاملرنه زیاته کړي او د افغان امنیتي ځواکونو نظامي روزنه دې ګړندۍ کړي.
په بلخ کې د افغانستان د خلکو سازمان ترنامه لاندې د مدني بنسټ مشر نجیب پیکان یې په اړه زیاتوي:
"بیا هم که افغان امنیتي سرتېري تجهیز نهشي هر څومره بمونو چې وغورځول شي ګټه نهکوي، دا په دې دلیل چې د افغانستان د راتلونکي ثبات او امنیت د افغان امنیتي ځواکونو په لاس کې دی او دوی باید مجهز شي."
د بلخ ولایت مدني فعالانو د هېواد د پخواني حکومت د ځینو مشرانو د هغه څرګندونو په اړه جدي غبرګون ښاره کړ چې ننګرهار ولایت کې یې د داعشیانو پر پټن ځاینونو د امریکا بمي حملې مخالفت کړی و.
د بلخ د مدني بنسټونو د اتحادیې غړې ملالۍ عثماني په دې اړه وايي:
"د افغانستان خلک په تېره بیا مدني بنسټونه غږ اوچتوي چې حکومت یا دولت وېښ شه او دښمن وځپه، خو کله چې دولت ویښ شي او غواړي تروریستان لهمنځه یوسي او وې ځپي بیا وايي چې نه بېرته د خوب تابلیت وخوره او ویده شه."
دا په داسې حال کې ده چې د ننګرهار ولایت د اچین ولسوالۍ په مامند دره کې د داعشیانو پر پټن ځایونو د امریکا هوايي ځواکونو له بمي حملې څخه د ګوتو په شمېر ورځې تېرې شوي خو دا حمله د هېواد په ګوټ ګوټ کې د مختلفو ډلو له پراخ مخالف او ملاتړ سره مل وه.
مجیب الرحمن حبیب زی