په داسې حال کې چې حکومت په وار-وار سره د غیر مسؤله وسلهوالو ډلو د لهمنځه وړلو خبره کړې خو د هېواد له شمال ختیځ ولایت بدخشان څخه داسې راپورونه رارسېدلي چې د دغه ولایت د فیضاباد ښاروال د حکومتي دندې تر څنګ د يوې غیر مسؤلې وسلهوالې ډلې مشري هم کوي.
د بدخشان ولایت يو شمېر اوسېدونکو په دې اړه ازادي راډیو ته وویل چې د دغه دولتي مسؤل وسلهوال فیضاباد ښار کې د هر ډول غیر قانوني کړنو توان لري چې خلکو تهيې لوی سرخوږی جوړ کړی دی.
د دغه ولایت يو تن اوسېدونکی شریف وايي:
"د جنرال نذیر محمد وسلهوال چې د فیضاباد ښاروال دی، عام و تام دا صلاحیت لري چې يو څوک وتښتوي له دندې یې لیرې کړي، لنډه دا چې هر کار کولای شي."
د دغه ولایت د خاص بدخشان ولسوالۍ يو بل اوسېدونکی عبدالرحمن بیا په دې اړه خپله ستونزه داسې بیانوي:
"د طالبانو تر څنګ د غیر مسؤله وسلهوالو ډلو موجودیت هم خلکو ته يوه لویه ستونزه جوړه او ټول هېواد کې يې بېبندوباري رامنځته کړې ده."
د بدخشان د امنیه قوماندانۍ پولیس هم په يو شمېر مواردو کې د فیضاباد ښاروال پورې اړوند وسلهوالو د غیر قانوني کړنو شاهدان وو.
د بدخشان ولایت د امنیت امر او د امنیه قوماندانۍ سرپرست محمد نبي بیان ازادي راډیو ته وویل چې د نذیر محمد کسان په تورو ښیښو لرونکو موټرو کې ګرځي او غیر قانوني کړنې هم کوي.
نوموړی وايي:
"د دوی د موټرو د ښیښو تور فلمونه مو پاک کړي، ان ځینو مو ګرځبندیز هم لګولی او د ځمکو د غصب د موضوع په اړه والي او يا هم ښاروال وپوښتئ، دغه موټرې يوازې د ښاروال نه بلکې د بدخشان ولایت يو شمېر نورو کسانو پورې هم اړوند دي."
د طالبانو تر څنګ چې د بدخشان په دوو ولسوالیو بشپړ واک لري، د غیر مسؤله وسلهوالو ډلو موجودیت د دغه ولایت د خلکو لويې اندېښنې دي.
څه باندې پنځه کاله کېږي چې جنرال نذیر محمد د فیضاباد ښاروال دی، د نوموړي په اړه داسې راپورونه ورکړل شوي چې د يوې وسلېوالې ډلې مشري هم کوي.
هڅه مو وکړه د دغو وسلهوالو کسانو د شمېر په اړه معلومات ترل اسه کړو خو هېڅ يوه دولتي چارواکی په دې اړه څه نهوايي.
د بدخشان والي احمد فیصل بيګزاد وايي، هر کله چې د دغه ښاروال له وسلهوالو دولت ته د خطر احساس وشي نو هله به اقدام وکړي، د هغه په خبره دغه وسلهوال د امنیه قوماندانۍ سره راجسټر شوي دي.
نوموړی وايي:
"دغه سړی د دې تر څنګ چې ښاروال دی په تېر کې د دغه ولایت يو تن مسؤل قوماندان هم و او دولت غوښتي چې د دښمن په وړاندې د ده له وسلهوالو استفاده وشي، د شمېر په اړهيې دقیق نهپوهېږم."
د محلي ارګانونو خپلواکې ادارې په دې اړه له څه ویلو ډډه وکړه خو د فیضاباد ښاروال جنرال نذیر احمد د ټیلیفون پر لیکه په دې اړه داسې ځواب راکړ:
"ټول بدخشان چې د ولسي پاڅون پورې مربوط دی زما پورې اړوند دي او هغه کسانو چې زما په اړه خبرې کړي له هغوی وپوښتئ چې څومره وسلهوال لري او جنګونو کې څومره مړه او ټپيان شوي دي."
له دې اخوا، پخوا داسې راپورونه هم ورکړل شوي چې د پخوانیو قوماندانو تر څنګ، يو شمېر حکومتي چارواکي، د ملي شورا غړي او ان له حکومته بهر هم يو شمېر کسان غیر مسؤله وسلهوال لري.
راپور: واصل وصال